الشيف يقدم أكلة لذيذة لشهر رمضان المبارك
يستضيف أحد برامج الطبخ الشيف ليقدم أحد الوجبات بمناسبة شهر رمضان وتسأله المذيعة : ايه أجمل أكلة أكلتها فى حياتك عشان تقدمها للسادة المشاهدين بمناسبة الشهر الكريم فيقول الشيف : اليوم هاوصف لكم أكلة لذيذة هاتعجبكم جداً ويبدأ فى شرح طريقة تجهيز الطبخة للمشاهدين فيقول : الأكلة دى إسمها شوربوتريا والأكلة دى مشهورة فى بلد .... يصمت قليلا ليحاول تذكر الدولة وبعدها يقول : معلش نسيت اسم البلد مع انى قضيت فى البلد دى شهر من أجمل أيام حياتى وتقريباً الأكلة دى بياكلوها بشكل يومى ، ولكن مش مهم البلد لان احنا فى برنامج طبخ مش برنامج سياحى والأكلة إللى هاوصفها لكم دى تحفة وهاتعجبكم قوى المهم أنكم تجربوها وساعتها هتتأكدوا من كلامى ده وهاتدعوا لى ان شاء الله وياريت تبقوا تبعتوا لى على الايميل إللى هيظهر على الشاشة ( لم يظهر شئ على الشاشة ) تقولوا لى عن رأيكم فيها وعجبتكم ولا لأ مع أنى متأكد أنها هاتعجبكم جداً
فتقاطعه المذيعة التى تقدم البرنامج وتقول له: شوقتنا ياشيف ممكن بقى تقول لنا المقادير وازاى ممكن نعملها ؟
فيقول الشيف : ما أنا كنت لازم أشوقكم الأول عشان أخليكم تركزوا معايا لأن الأكلة دى من أجمل الأكلات إللى أكلتها فى حياتى فعلاً
فتقول المذيعة : يلا ياشيف قول لنا الطبخة ، أنا والسادة المشاهدين فى انتظار المقادير وطريقة التجهيز
يصمت الشيف فترة يفكر وبعدها يقول : أنا أسف ؛ أنا محرج منك ومن السادة المشاهدين جداً
فتسأله المذيعة : ليه ياشيف ؟
فيقول الشيف فى خجل: أنا فعلا الأكلة دى عجبتنى جداً ولكن للأسف نسيت أسأل أهل البلدى دى عن المقادير وطريقة التحضير ، ويكمل كلامه قائلاً : بس والله الأكل دى من أجمل ما أكلت فى حياتى فعلاً.
 |
| الشيف يقدم أكلة لذيذة لشهر رمضان |
أحمد البوهى
ليست هناك تعليقات:
إرسال تعليق