الستات
الست زمان كانت طيبة وبتسمع كلام جوزها حاضر طيب نعم واللى انت عاوزه دا انا اديك عنيا .
طب ايه إللى حصلكم ياستات ليه اتغيرتوا وبقت الواحدة منكم جوزها يقولها صباح الخير تقوله ليه بتصبح على اكيد عامل عاملة سودا امبارح وبتحاول تدارى قول اعترف احسن لك الإنكار مش هيفيد وياعينى الراجل يبقى عاوز يقوم يضرب نفسه ميت جزمة انه قالها صباح الخير .
بس عايزين الحق هما معاهم حق يعنى انت كل يوم تقوم ماتصبحشى عليها وهى اتعودت على كده ايه إللى يخليك تقوم تصبح عليها فجأه كده ماهى فعلا لازم تشك فيك ما تقوم زى كل يوم مبوز وانزل روح شغلك ايه إللى سحبك من لسانك تقولها صباح الخير صدقنى انت إللى غلطان مش هى .
اه احنا صحيح دلوقتى من كتر مابنتفرج على اغانى فيها ملكات جمال بنحس ان احنا متجوزين واحد صاحبنا عشان كده بنبطل رومانسية وكلام حلو لاننا بنحس ان احنا اضحك علينا .
فخلاص بقى كمل حياتك مع صحبك إللى اتدبست فيه وماتعملش فيها رومانسى فجأة وتزعل لما يشك فيك كمل على إللى ابتديته أو مهد له على الأقل انك ناوى تتحول لرومانسى بس خد بالك وانت بتتحول لرومانسى لو حبيت تتراجع هتبقى ايامك سودا معاها فخد بالك وانت بتاخد قرارك عاوز تبقى رومانسى وتكمل ولا تخليك على إللى انت فيه .
ونصيحة اخيرة لو حبيت تبقى رومانسى بطل تتفرج على قنوات الاغانى أو الأفضل انك تمسحها من على جهازك عشان ماتخسش انك متجوز واحد صاحبك .
وصدقني يا صاحبى كلهم من غير مكياج حاجة تانية خالص فمتركزش مع بتوع الاغانى وعيش رومانسى واستمتع برومانسيتك بس لازم تمسح قنوات الاغانى .
وبعدين يا سيدى قوم بس فى المراية انا راضى ذمتك انت شبه الرجالة إللى بتظهر معاهم فى الاغانى لو انت شايف نفسك شبهم ليه مااتجوزتش واحدة زى إللى فى الاغانى ، انت إللى غلطان وده كان اختيارك من الاول.
 |
| الستات |
أحمد البوهى
ليست هناك تعليقات:
إرسال تعليق