مع السلامة ومرحباً
ومن كترهم الذكريات تدخلت فى بعضها وكتير منها نسناه من زحمة الذكريات فى دمغنا .
ايه خلاص هتمشى دا احنا لسه مالحقناش نقعد معاكى مستعجلة ليه على المشى ماتستنى شوية كمان معانا ليه عايزة تمشى بسرعة كدة وتوحشينا ماكل إللى قبلك مشيو زيك ومالحقناش نقعد معاهم برضو ومارجعوش تانى وبقوا مجرد ذكريات
واضح انك مصرة زى إللى قبل على الرحيل وبتقولى ان ده قدر ومكتوب علينا ومافيش مفر منه وفية واحدة جديدة جاية لسه صغيرة وحلوة وهتقعد معانا شوية برضو وبعدين تمشى زيك ، انت ليه بتعجزو بدرى وبتمشوا ومابنلحقش نشبع منكم معقولة ، قدر ونعم بالله ويارب إللى هتيجى بعدك تكون احلى .
وبتمشوا ودايما تاخدوا معاكوا حتة منا مافيش واحدة فيكم مشيت إلا ماخدت منا حتة وتسيبوا لنا طيف فى دماغنا بيداعبنا من وقت للتانى لما نروح مكان روحناه معاكى أو لما بنسمع اغنية سمعناه معاكى فى لحظة حلوة او لما الفريق إللى بنشجعه يفوز ببطولة طيف مجرد طيف بنسمية الذكريات وساعات بتكون ذكريات وحشة بنهرب اننا تفتكرها .
يلا مع السلامة يا ٢٠١٩ واهلا وسهلا يا ٢٠٢٠ وكل سنه وانتم طيبين .
 |
| Happy new year |
أحمد البوهى
ليست هناك تعليقات:
إرسال تعليق