 |
| الدنيا ورده مفتحة |
الدنيا وردة مفتحة بس انت شوفها وردة مفتحة واسمع أغانيها فى صوت عصفور واقف على الشجر بيغنى للوردة وجمالها وعبيرها إللى مالى المكان حواليه .
بس انت اسمع واستمتع وركز فى الجمال حواليك وماتقفلش على نفسك شبابيكك وما تمنعش نور الشمس انه يدخل عليك ينور نهارك ويدفيك فى الأيام البرد وشوف نور القمر وسيبه ينور لياليك واسمع مواويله فى صوت الكروان إللى بيغرد حواليك .
وأمشى وبص فى وشوش الناس واضحك حتى لو قالوا عليك مجنون الضحك فى وشهم صدقة وثواب كبير عند ربك .
عود نفسك على السعادة لحد ما تبقى عادة أصيلة ومتأصلة فيك فكل شئ عادة ، الحلو فى حياتك عادة والوحش برضوا عادة ، كل عادة ابتدت بفعل صغير واستمرت معاك لحد مابقت جزء منك .
الحلو سيبة والوحش اتخلى عنه بان تتعود على ضده ابتدى بضده وكرره وهو لوحده هيتحول لعادة هتعملها من غير ماتحس بيها وكانك بتعملها من صغرك والعادة القديمة اللى مش كويسة هتمشى من سكات لانها شيطان والشيطان مابيقعدش فى مكان فيه ملاك .
فاملا نفسك بالخير بالتعود عليه تبتعد عن الشر وتعيش سعيد واسمع لاغانى الكون فى صوت الطيور وشم ريحته فى ورده جميلة واستمتع بنور الشمس ودفئها فى الأيام البرد وبالليل غنى للقمر واستمتع بضيائه الجميلة .
لو شوفت الدنيا حلوة هتبقى حلوة ولو شوفتها العكس هتبقى العكس والشيطان والملاك لا يمكن يجتمعوا فى مكان واحد فشوف انت بترحب بمين جواك .
فماتسيبش الشيطان يدخل ويقعد لأنه عدوك ورحب بالملاك لأنه بيحبك وفيه الخير .
وارقص مع الدنيا بالية وطير بخفة ورشاقة معاها أرقص على أطراف رجليك وطير لفوق هتوصل طالما كنت مصر هتوصل بفضل ربك بس انت استمر انك لفوق تنط استمر لحد ما توصل .
ليست هناك تعليقات:
إرسال تعليق