لازم نشجع الناشئين فى كل مجال

أثناء سير هنبقة هو وصديقه فى البلد فى منطقة خالية من المارة يقطع طريقهما طفل صغير لا يتجاوز عمره العشر سنوات يحمل عصا و يقول لهما : طلع إللى معاك انت وهو 

يقول صديق هنبقة للولد : العب بعيد ياشاطر بدل ما اكلك علقة سخنة تنسيك إسمك وإسم إللى خلفوك وماعرفوش يربوك 

يقول الولد : طلعوا إللى معاكم من غير كلام احسن لكم

يقول صديق هنبقة: إمشى من قدامى يابنى وبلاش لعب العيال بتاعك ده 

يرفع الولد العصا فى وجهه ويقول بعصبية: طلع إللى معاك أحسن لك بدل ماأعورك انت ماتعرفنيش فى غضبى 

- انت إللى متعصبنيش وإمشى من قدامى أحسن لك

واثناء هذه المشاجرة بين صديق هنبقة والولد يخرج هنبقة ما فى جيبه ويعطيه للولد ويقول لصديقه : اديله كل اللى معاك فيقول صديقه له : أنت بتقول ايه يا هنبقة انت خايف منه ولا ايه دانا ممكن أقطعهولك دلوقتى

- اسمع اللى باقولك عليه يا صديقى واديلوا إللى هو عايزه

- ماشى لما اشوف اخرتها ايه ويخرج ما فى جيبه ويعطيه للولد

فيقول الولد : اقلعوا هدومك انتو الاتنين 

فيخلع هنبقة ملابسه ويعطيها للولد ويقول لصديقه : اقلع يا صديقى ملابسك واديها للولد فيخلع صديقه الملابس ويعطيها للولد

يأخذ الولد ملابسهما ويرحل فينظر صديق هنبقة له فى تعجب ويقول : ايه إللى انت عملته ده ازاى نسيب عيل صغير زى ده ياخد حاجتنا ويمشى لو سيبتنى عليه كنت ضربته علقة سخنة 

- أه هو عيل صغير وممكن كنا ضربناه علقة سخنة بس المجتمع كان هيخسر حرامى ناشئ

- مش فاهم قصدك إيه  

- بص يا صاحبى الولد ده مشروع حرامى صغير واحنا لازم كنا نشجعه عشان ياخد الثقة فى نفسه ويستمر 

- واحنا نشجعه ليه ونديلوا ملابسنا وكل حاجتنا ليه

- لازم تعود نفسك انك تقف جنب الأشبال الصغيرين فى كل المجالات وتشجعهم لان هما دول المستقبل وانا شوفت فى الولد ده مستقبل حرامى ومش اى حرامى لأ حرامى بيسرق بالإكراه 

- واحنا مالنا 

- ازاى احنا مالنا الولد ده لازم يتشجيع عشان يبقى عندنا حرامى بالإكراه نفتخر بيه قدام العالم كله 

- معلم ياهنبق طول عمرك 

- ايوه لازم الواحد يساعد كل واحد يجتهد فى مجاله عشان بلدنا تتقدم وتتطور 

- انت بجيب الكلام ده منين يا معلم 

- سمعته فى التليفزيون 

ويعود هنبقة لبيته عارياً فتسأله زوجته عن ملابسه فيقول لها  بفخر : عيل صغير عنده حوالى عشر سنين خدهم منى بعد ماهددنى بعصايا انا وصاحبى

- انت مش مكسوف يارحل من نفسك لما عيل صغير يسرق هدومك انت وصاحبه بالإكراه

- انا اتسرقت بمزاجى عشان أشجعه على السرقة والمجتمع يكسب حرامى 

- يافرحتى بيك وانت داخلى عريان بالشكل ده عشان بتشجيع عيل ماترباش يبقى حرامى
- أه وفى التليفزيون بيقولوا كده
- التليفزيون هو إللى بيقول   للناس شجعوا الحرامية على السرقة ولا دماغك البايظة هى إللى فهمت الكلام غلط كالعادة .
إحنا اللى إديناله حاجة امبارح
مراتى هى إللى قالت لى

أحمد البوهى