أنا بتاع بنى آدمين

تدخل سيدة ومعها كلب الى الدكتور فيقول لها : بتشتكى من ايه يا هانم 

- مش أنا إللى عيانة ده روجى هو إللى عيان

- وهو فين روجى يا هانم ليه مادخلش معاكى وسيبتيه بره  أخلى التمرجى يدخله 

- لأ روجى ده ( تشير إلى كلب معها )

- بس ده كلب ياهانم أنا دكتور بأعالج البنى آدمين مش الحيوانات

يزمجر الكلب فيمتلأ وجه الدكتور بالخوف ويقول : كلب تانى هو أنا موعود بالكلاب ياربى 

- بس ياروجى أنا هافهمه هو انت مش دكتور ولا انا دخلت فى مكان غلط 

- ايوه دكتور بس دكتور بشرى مش بيطرى
يزمجر الكلب مرة أخرى 

- بس يا روجى عيب كده انت بتخوف الدكتور
ثم تلتفت له وتقول : يعنى ايه مش فاهمة 

- يعنى أنا باعالج بنى آدمين مش حيوانات 

- وايه الفرق بينه وبين البنى آدمين ده عندى أحسن منهم إدانى الحنان والحب والوفاء إللى ماشفتوش مع البنى آدمين يا دكتور ، روجى هو كل حاجة فى حياتى وماليش غيره ولو حصل له حاجة أنا ممكن أموت

- كلام جميل بس ولو انت خايفة عليه خديه وديه لدكتور بيطرى هو إللى هيعرف يعالجه
يزمجر الكلب مرة أخرى ويحاول أن يهجم عليه فتجذبه السيدة بالسلسلة التى تربطه به وتقول : لأ روجى حبيبى مش حيوان عشان أوديه لدكتور بيطرى البنى آدمين هما إللى حيوانات 

يقول الدكتور بعد أن ترك الكرسى الذى يجلس عليه ووقف عند شباك العيادة ووجهه قد مُلئ بالرعب : بس انا بعالج بنى آدمين مش بعالج حيوانات
يبدأ الكلب فى النباح ويحاول الهجوم عليه فتجذبه السيدة وهى تقول : مش كنت تقول انك بتاع حيوانات يلا يا روجى يا حبيبى نروح لحد تانى لأنه طلع بتاع حيوانات
بعد أن تخرج بالكلب يجلس على كرسيه ويحاول أن يتمالك أعصابه ويقولة فى تعجب: أنا بتاع حيوانات !! وبعدين مانا من أول ما دخلت وأنا بأقولها انى بتاع بنى آدمين مش حيوانات ويواصل كلامه فى سخرية : ايه بتاع بنى آدمين دى خلاص أنا من بكره هاشيل الياقطة إللى مكتوب عليها انى دكتور وأحط بدلها يافطة مكتوب عليها انى بتاع بنى آدمين ايه الغلب إللى أنا فيه ده يا ربى .

أحمد البوهى