عطشه ولما هيعطش هيقول ماء ماء

يقف عريان فى شباك بيته فيرى ظريف يسير فى الشارع فينادى عليه ويقول : لو سمحت 

فينظر ظريف له ويقول : انت بتنادى علىَّ

عطشه

- أه 

- عاوز ايه أنا فى خدمتك

- ماتعرفش دكتور لِعَبْ

- ليه 

- عندى خروف لعبة عاوز أعالجه 

- أنا دكتور لِعَبْ
يقول له : لو سمحت لحظة وراجع لك
يدخل وبعد فترة قليلة يعود وبيده الخروف اللعبة  ويقول : الخروف ده من ساعة مااشتريته مش راضى يأكل وعشان كده مابيكبرش 

- طب ممكن أكشف عليه 

- خلاص اتفضل تعالى اكشف عليه
يدخل ظريف شقة عريان فيجدها بلا أثاث أو باب فيقول : ايه ده شقتك مافيهاش لا أثاث ولا باب وانت كمان قاعد عريان

- ما انا عاوز أكبر الخروف عشان أبيعه وأستفيد بفلوسه وأعمل فروته لبس أستر بيه نفسى 

يمسك ظريف الخروف ويخبط عليه بيده ثم يقول : ده ضعيف خالص 

- لأنه زى ما قلت لك مش راضى يأكل ومش بيرضى يفتح بقه خالص

- بتشربه مية 

- لأ

- يعنى مابيشربش مية 

- ما أعرفش 

- طب بص عطشه ولما يعطش هيفتح بقه وهيقول ماء ماء فلما يفتح بقه حط الأكل فيه وبكده يأكل ويكبر هههه

- شكراً يا دكتور 

يشعر ظريف بالسعادة ويقول : ايه ده الراجل شكرنى على النكتة يعنى أنا دمى خفيف والناس بيعجبهم نكتى أنا مش هابطل نكت نهائى .
حكايات ظريف
حكايات عريان

أحمد البوهى