اقعد مع نفسك شوية

يجلس الرجل الذى كان يطارد الأرنب مع البدوى بعد أن أكل معه ويسأله البدوى : انت ايه اللى جابك هنا

- كنت مسافر شرم الشيخ والأتوبيس إللى كنت ركبه عطل فنزلت مع الركاب ننتظر الميكانيكى اللى كلمه السواق عشان يجى يصلح الأتوبيس .

وأنا واقف انبهرت بمنظر الجبال وروعتها فمشيت وسطها ونسيت نفسى ولما رجعت لقيت الأتوبيس مشى وبعد فترة حسيت بالجوع ولما شوفت الأرنب جريت وراه عشان أصطاده وأكله 

يضحك البدوى ويقول : كنت هتاكله نىّْ

- ساعتها مافكرتش 

- يا ولدى احنا علينا السعى أما الرزق فده بإدين اللى خلقنا والأرنب إللى انت طاردته ده كان سبب عشان تيجى هنا وتأكل معايا

- طب انت قاعد لوحدك هنا ليه

- انا كل سنه لازم أجى أقعد هنا أسبوعين لوحدى انعزل فيهم عن الناس 

- بس أنا أعرف أن عددكم قليل هنا ، دا فى القاهرة الناس بتخبط فى بعضها وهى ماشية 

- وعشان كده الدنيا سرقاهم من نفسهم وعاملين يجروا زى الخيل فى السبق ياولدى لازم الواحد يقعد مع نفسه شوية يخرج فيها من الدوشة والزحمة ويبقى هو ونفسه وبس وده شئ أنا إتعودت عليه من وأنا شاب أخد الخيمة بتاعتى وإنعزل فترة أقعد فيها مع نفسى .
- والأكل بيجى لك ازاى
- القرية إللى انا منها مش بعيدة عن هنا وبنتى كل يوم بتجيب لى الأكل وترجع .
اسعى لرزقك ولكنه قد يأتيك من حيث لاتعلم

أحمد البوهى