وادى الغيلان

يسير هنبقة وصديقه حاملاً الفانوس فى الظلام وفجأة يقول صديقه له : انت عارف احنا فين ياهنبقة ؟

- احنا فين ؟

يشير إلى يافطة ويقول : فى وادى الغيلان 

ينظر هنبقة لليافطة ويقرأ المكتوب عليها فى ضوء القمر ويقول : العفريت ده عاوز مننا ايه أنا مشيت حسب الوصف بالظبط ؟

- ياهنبقة أنا كده إبتديت أشك فى معلمتك 

- ياعم مش وقته لما نشوف ايه إللى هيحصلنا ؟

- هنتاكل طبعاً العفريت الندل ده إللى ماصنش الدلع إللى دلعناهوله جبنا هنا لصحابة عشان ياكلونا

- طب هنعمل ايه دلوقتى ؟ 

- مش انت المعلم اتصرف بقى 

- هو ليه العفريت ماخرجش من الفانوس بعد ما وصلنا المكان إللى وصفه لنا

- يمكن خايف من الغيلان 

- هو برضو هيخاف من أصحابه

- يمكن مستلف منهم فلوس ولاعليه تار 

- يعنى لو هو زى ما بتقول كان جبنا هنا عشان يأكلوه

- ماهو غبى ومابيعرفش حاجة فى دنيته غير أنه يدلع

- بص احنا نرمى الفانوس هنا ونجرى بسرعة 

يلقى الفانوس على الأرض ويقول لصاحبه : يلا بينا، وبعد فترة توهان في الصحراء يتمكنا من العودة للبيت. 
ويدخل هنبقة بيته هو صاحبه وهما ينهجان من الجرى والتعب فيقول صاحبه له: حركة الجرى دى أثبتت إنك معلم ياهنبقة
- وكمان رميت الفانوس وبكده نبقى خلصنا منه ومن رذلته
- رجعت بقيت معلم تانى ياهنبقة
- يابنى أنا طول عمرى معلم

فجأة يظهر لهم العفريت بعد أن ينهى كلامه ويقول : فين الفانوس علشان ادخل فيه ونروح مشوارنا ؟

ينظر هنبقة لصاحبه وينظر صاحبه له وعينهما تملأهما التعجب والحسرة
ويقول هنبقة له : احنا عملنا ايه معاك وحش عشان تعمل فينا كده
ويقول صاحبه : حرام عليك .

أحمد البوهى

حكايات هنبقة