قال نكتة للمحتجزين
نتيجة لاصراره على انه يقول نكت للشاويش يقوم الشاويش بالقبض عليه وإيداعه بحجز القسم وفى الحجز يجلس ظريف بجوار أحد المحتجزين فيقول له : أقول لك نكتة
فيقول له المحتجز : ياريت أهو تساعدنا على أننا نعدى الايام الصعبة دى
فيقول ظريف : مرة واحد جه يقول نكتة لشاويش اتقبض عليه واترمى فى الحجز هههههه
فيقول له المحتجز فى غضب : يابنى مش انت وعدتنى انك هتقول لى النكتة
- أه
- طب ليه بتحكي لى الحكاية دى ؟
- دى مش حكاية دة النكتة
يقول له فى غضب : يعنى اللى انت قولته دلوقتى ده نكتة
- اه ايه رأيك حلوة ؟
يقول فى استخفاف : هى حلوة وبس ، دى حلوة جداً بس ما ينفعش أنا أسمعها وانبسط لوحدى وباقى المحتجزين لأ
يقول ظريف فى فرح لاعجابه بالنكتة : انت عايزنى أقولها كمان لكل المحتجزين
- أه خليهم ينبسطوا ويعدوا الايام الصعبة دى زى ما أنا انبسطت كده واقوم بقى قول النكتة الحلوة دى ليهم
- أنا شكلى كده هاحب الحجز ده ومش هأخرج منه ابداً
ويقف المحتجز ويقول للمحتجزين : الأخ ظريف ده إسم على مسمى كده خفيف جداً وبيقول نكت ماحصلتش وقال لى نكتة عجبتنى قوى فعايزكم تسمعوها وتضحكوا عليها زى انا ما ضحكت عليها بس عايزكم تكرموه وتقوموا معاه بالواجب بعد مايقولها وينظر لظريف ويقول له : قول لهم النكتة
فيقوم ظريف مزهوا بنفسه كالطاووس ويقول ما قاله للمحتجز الذى كان يجلس بجانبه وبعد أن ينتهى مما قاله ينطلق كل المحتجزين بلا استثناء نحو ظريف فى غضب ويبدأوا فى ضربه وهم يقولوا فى نفس واحد : هى ناقصة إستظراف يا ابن الظريفة وبعد أن ينتهوا من ضربه يقول المحتجز الذى كان يجلس بجواره ويقول : لازم أنا كمان أكرمه مش كده ولا إيه ؟
 |
| قال نكتة للمحتجزين |
أحمد البوهى
ليست هناك تعليقات:
إرسال تعليق