الشاويش قبض على صاحبه بسبب أنه نادى له
يقف مدبولى فى الشارع ويقول بصوت عالى : ياشاويش .... ياشاويش ... ماترد يا زفت .... انت ياحمااااار ..... ياااااشاويش
يسمع الشاويش ندائه وسبابه له فيتوجه إليه غاضباً ويمسكه من كتفه ويقول له : قدامى يامجرم على القسم
 |
| الشاويش قبض على صاحبه بسبب انه نادى عليه |
فيقول مدبولى له : ليه ياشاويش هو أنا عملت حاجة
فيقول الشاويش فى غضب : أنت مجنون ياجدع انت مش حاسس باللى بتقوله
- ليه بتقولى كده ياشاويش ؟
- انت من دقيقتين كنت بتنادى على مين
- على الشاويش
- واللى واقف قدامك ده وظيفته ايه ؟
- وظيفة سيادتك شاويش طبعاً
- يبقى انت كنت بتنادى على مين دلوقتى
- مش بنادى عليك انت ياشاويش
- ياجدع انت هتجننى ولا انت فعلاً مجنون
- والله ياشاويش أنا عاقل وفاهم ومدرك أنا بأقول ايه
- طالما عاقل يبقى قدامى على القسم يامجرم
وفى تلك اللحظة يخرج شخص من شباك فى الدور الثالث من البيت الذى يقف أمامه ويقول لمدبولى : فيه ايه ياحيوان عمال تنادى وتشتم ليه ؟
فيقول مدبولى له : أنا عمال ارن لك على الموبايل ومش بترد علىَّ وعمال أنادى عليك برده ومش بترد
- كنت فى الحمام بأستحمى يعنى كنت عايزنى أخرج من الحمام عريان عشان أقف فى الشباك وأراد عليك
يجذب الشاويش مدبولى من ملابسه ويقول له : يللا يامجرم على الحجز
فيقول مدبولى لصاحبة : قول لسيادة الشاويش انت اسمك ايه
فيقول صاحبه : أنا إسمى على
فيقول مدبولى له : الله يخرب بيتك مش ده قول له اسمك إللى انت مشهور بيه بين اصحابك وفى المنطقة
- وعايزنى أقوله ليه للشاويش ؟
- هو سر حربى ما كل الناس إللى فى المنطقة عارفينه ماتقول يارخم
- أنا نفسى أعرف ايه علاقة إسمى بالشاويش
- انت غبى ولا إيه
- ليه ؟ وبعدين هو الشاويش مساكك كده ليه ؟ ؛ هو انت بتقبض على اصحابى يا سيادة الشاويش
- ماتقول إسم الشهرة بتاعك وإخلص
- لو ده إللى هيخلى الشاويش يسبك أنا إسم الشهرة بتاعى الشاويش
فيقول له الشاويش: يعنى انت اسم الشهرة بتاعك الشاويش
- أه
فيقول الشاويش فى غضب : والله لأطلع أقبض عليك
- فيقول صاحب مدبولى للشاويش : هتقبض علىَّ بتهمة ايه سيادتك
- بتهمة انتحال صفة رجل أمن يا أبو دم خفيف
فيقول صديق مدبولى له : ضيعتنى يامدبولى الله يخرب بيتك
أحمد البوهى
ليست هناك تعليقات:
إرسال تعليق