عمال يتراقص فى الحجز
يجلس سمورة فى الحجز ويقول فى انزعاج : الله وبعدين بقى كده مش كويس .. لأ كده كتير قوى ومايصحش .. وبعدين بقى .. ايه ده وبيجروا كمان
 |
| قاعد يتراقص فى الحجز |
فيقول رجل يجلس بجواره : أنت مالك عمال تتلوى وتترقص كده ليه وعامل ازعاج فى الحجز؟
فيقول له : هو أنا بس إللى بيحصل لى كده ولا إيه ؟
- ما تقعد كده زى الرجالة انت ناقص تقوم ترقص
يقول له وهو يتراقص اثناء جلوسه : من إللى بيحصل لى جوه
- جوه فين
- تحت الهدوم ياسيدى فيه حاجات عماله تجرى وعماله تقَرَّص فيا
فيضحك ويقول له : انت باين عليك مستجد وأول مرة تشرف هنا
- أه وان شاء الله هتكون آخر مرة
- بكرة تتعود عليهم وتصاحبهم كمان
- يعنى الحشرات إللى عمال تلعب جوه دى هيبقوا أصحابى
- أه وهيوحشوك قوى لما تخرج كمان
- بس أخرج من هنا وأنا اموتهم كلهم
وفى تلك الأثناء يدخل الشاويش وينادى عليه فيقول له : إفراج ياشاويش
- لأ ياخفيف هاخدك للنيابة عشان وكيل النيابة يحكم عليك بالإعدام
- ياشاويش القاضى هو إللى بيحكم بالإعدام
- قدامى يامجرم وبطل كلام كتير
وفى النيابة يعطيه وكيل النيابة إفراج فيأخذه الشاويش للقسم لينهى إجراءات الإفراج فيجد أصدقاء سمورة مع الرجل الذي كتب له صديقه علاج خاطئ فى القسم للتنازل عن المحضر فيقول له الشاويش : يعنى انت عاوز فعلاً تتنازل عن المحضر ولا أقبض عليهم التلاتة
- لأ المسامح كريم ياشاويش خلاص أنا خفيت وبقيت كويس الحمد لله
وبعد انهاء الإجراءات يخرج الثلاثة وسمورة مازال يتراقص فيسأله صديقه الذى تسبب فى القبض عليه عن سبب تراقصه فيقول : بسبب أصحابى إللى اتعرفت عليهم فى الحجز بسببك ياساقط الاعداية وعاملى فيها دكتور
فيقول له : هما فين دول احنا مش شايفين حاجة
فيدخل يده فى ملابسه ويخرج مجموعة منهم ويضعهم داخل ملابسه وهو يقول : دول هما أصحابى إللى اتعرفت عليهم فى الحجز
فيقول صديقه الآخر له : هو اللى انت حطيته فى هدومه ده ممكن يتاكل
فيضع يده فى ملابسه ويخرج مجموعة أخرى ويضعها فى ملابس صديقه وهو يقول : أه خد المجموعة دى عشان تأكل وتتغذى يامفجوع
فيسير الثلاثة وهم يتراقصون فى الشارع وعندما يكتشفوا ان المارة بدأوا فى متابعتهم بعيونهم يحاولون ان يتماسكوا ولكن لا يستطيعوا فيجروا ليعودوا لبيتوهم بسرعة ليتخلصوا من هذه الحشرات .
أحمد البوهى
ليست هناك تعليقات:
إرسال تعليق