ياخى البنات دول عليهم تقاليع غريبة اه والله تقاليع غريبة ومش مفهومة تلاقى الواحدة منهم تصبح على الصبح تدور على الجزمة إللى بكعب - اه جزمة اسمها جزمة هو انا عشان اكون ابن ناس لازم اقول شوز - المهم تصبح تضرب رجلها فى الجزمة وتنزل والحياة حلوة وجميلة وقمة التفائل وماشية فى الشارع طايرة والحياة بمبى بمبى وفجأة وهب الحياة إللى كانت بمبى تتحول للأزرق
يا بنتى ربنا خلقك بتمشى عادى زى البنى ادمين ليه تعملى فى نفسك كده تمشى تعرجى فى الشارع ايه لازمة الكعب عايزين تطولوا القصر للبنات حلاوة اه والله ماتسيبولنا احنا الطول - الطول للرجالة هيبة بردوا - احنا هناك فوق ليه عايزين تطلعوا لنا على فكرة فوق زى تحت مافيش اى فرق
وعايز اقولك حاجة زمان كنا بنلبس برضو جزم بكعب ( كان اسمه كعب بروتان) ولكن لاننا عمليين وتفكيرنا فى إللى يقضى الغرض وبعد ماشوفها عيوبه بطلنا نلبسه وأصبح بالنسب لنا تاريخ وماضى نسناه خلاص لأنه ما ينفعش نتمسك بحاجة ممكن تقفل معانا اليوم من اوله تحوله من بمبى لازرقع
هتقولوا ان ممكن الجزمة العادية برضوا بتتقطع وانا باقولك ايوه معاكوا حق بس الجزمة العادية بتدى انذار واتنين وتلاتة ولما بتلاقى صاحبها مطنش وبيستهبل بتفتح بوقها لأنه حملها اكتر من طاقتها لكن الكعب فى ثانيه هب تلاقيه انكسر بدون اى مقدمات .
المقالات
أحمد البوهى
ليست هناك تعليقات:
إرسال تعليق