البخيل يعزم هنبقة وصاحبه على خروف |
| البخيل يعزم هنبقة |
أثناء سير هنبقة فى المدينة يرى البخيل فيقول لصاحبه ايه رأيك لو أعزمك عند البخيل
- مستحيل ده يحصل
- تعالى بس وانت تشوف أنا هاعمل معاه ايه
يقترب هنبقة وصاحبه من البخيل ويسلم عليه ويقول له : هو انت صحيح بخيل زى ما الناس بتقول عليك
- وهو مين سِلم من كلام الناس ياأخ هنبقة
- يعنى انت مش بخيل
- لأ طبعا انا عمرى ماكنت بخيل أنا بحافظ على فلوسى وبتهيألى إن أى حد عاقل بيعمل كده
- بس الناس بتقول ان انت عمرك ماعزمت حد حتى على كوباية مية
- لأ بأعزم طبعا
- بس إحنا فعلا عمرنا ما شفناك عزمت حد
- طب انت وصاحبك معزومين عندى على الغدا النهاردة
ويتركهم ويمشى فيقول هنبقة لصاحبة المذهول من عزومة البخيل : شوفت المعلمة اتعلم بقى عشان تبقى معلم
- والله نفسى ابقى معلم ياهنبقة زيك بس مش عارف
- معلش طول ما انت معايا وصاحبى هتتعلم ماهو التكرار بيعلم الشطار وانت شاطر بس ناقصك العلام
وفى موعد الغذاء يسمع البخيل خبط على الباب على غير العادة فلا أحد يزوره فى المدينة كلها فيعرف ان من على الباب هو هنبقة وصاحبه فيقول لابنه قبل ان يفتح الباب : يلا خش جوه واستعد وإعمل إللى اتفقنا عليه ويذهب إلى الباب ويفتح مرحبا بهنبقة وصديقه ويقول : اتفضلوا أهلا وسهلا، أنا والله فى قمة السعادة أنكم شرفتونى النهاردة
- ربنا يديم المعروف
- أنا والله قعدت أفكر أعملكم ايه على الغدا النهاردة لحد مالقيت ان أحسن حاجة انى أعزمكم على خروف ، ونزلت اشتريت الخروف والجزار جوا بيدبحه وبعد ما يخلص ان شاء الله نشويه على طول معلش انى اتأخرت فى تجهيزه على مانزلت واشتريته لقيت وقت الغدا جه وخفت اأجل لتفتكروا انى بأتهرب من العزومة
- ولا يهمك براحتك خالص
ونادى البخيل: هيه دبحتوا الخروف ولا لسه فيسمعوا صوت هوهوة كلب وبعدها يزوم كانه يذبح و بعدها يقول : ابنه خلاص دبحناه يابابا
ينظر هنبقة لصاحبه وقد ملأ وجهه الإشمئزاز ويقول : يلا بينا نروح مشوارنا ونرجع يكونوا خلصوا السلخ والشوىّ
ويقوم مسرعا هو وصديقه ويخرجوا ويغلقوا الباب خلفهم فينادى على إبنه سعيداً ويقول: برافوا عليك هوهوتك زى هوهوة الكلب بالظبط
وفى الشارع يمشى هنبقة وصديقه ويقول له: الراجل البخيل النتن عاوز يأكلنا كلب صحيح إللى فيه طبع مش ممكن يغيره
- بس انت معلم يا هنبقة
- أه شوفت انا خرجتك من الموقف ده ازاى لو انت لوحدك كان زمانك متدبس فى أكلة كلب ما انا عارفك بتغرق فى شبر مية وما بتعرفش تتصرف
ليه ماكلتوش الخروف
ليه ماكلتوش الخروف
أحمد البوهى
ليست هناك تعليقات:
إرسال تعليق