الحمار الفيلسوف

الحمار الفيلسوف

وقف الحمار يخطب فى الناس وشاف نفسه فيلسوف وخطيب وقال كلام ماحدش فهمه وهو فاكر ان الكل فهمه لما لقى الكل بيسقف وماحدش قدر يقوله بطل وقف يجى تلت اربع ساعات ينهق والكل عمال يقول له الله كمل والحمار صدق نفسه وفضل ينهق .

الكل مش فاهم حاجة وهو عمال ينهق وايه هتنتظر منه غير انه ينهق وعشان كده ماعملش حاجة فى التلت اربع ساعات غير انه ينهق والكل عمال يسقف .

عجب الحمار الحال وجمع الناس كل يوم عشان ينهق والكل عمال يسقف مش مهم انهم مش فاهمين المهم ان الحمار يكون مبسوط وهو بينهق ويحس انه فيلسوف مفوه . 

كبرت الحكاية فى دماغ الحمار وافتكر انه أسد واستأسد والكل برضوا عمال يسقف واى حد يقول له بطل نهيق وأسكت يرفسه برجله والكل برضو بيسقف .

وكل ده عشان الحمار رفس الأسد العجوز اللى أسنانه وقعت فافتكروا انه اقوى من الأسد وفضلوا من يومها كل الحيوانات تسقف والحمار واقف بينهم بينهق وكل إللى يعترض يرفسه برجله .

ومن يومها بقى الحمار ملك ومابيعملش اى حاجة غير انه ينهق والكل يسقف واللى خايفين على المملكة كلهم اترفسوا والى ببسقفوا فرحانين فى اللى اتعمل فيهم وبيقولوا لهم احسن ماتسيبوا الحمار ينهق اه يا زمن الحمير بقوا فيه ملوك لما الأسود  وقعت سنانهم  .
ماهو لو كان الأسد عدل ماكنش الحمار وصل .

المقالات 

وأحمد البوهى