انت إنسان
 |
| انت إنسان |
انت مش خيال مأتة واقف بيخوف الطيور فى الحقل والطيور فعلا بتخاف منه لانها فاكرها بنى آدم وماتعرفش انه مجرد حتة خشب عليها حتة قماش متقطعة مش مدركة لا بالطيور ولا حتى بنفسها ولا تعرف ان كانت موجودة ولا لأ .
ولا أراجوز بيتحرك ويتكلم ويحب ويكره وهو برضوا مش مدرك بكل إللى بيحصل ولا فاهم اى حاجة ولا عارف ان إللى بيحركه حد تانى وماشى على سيناريو مكتوب بيتحرك على أساسه .
ولا بطل فى فيلم رسوم متحركة إللى بيتحرك على الشاشة وبيضحك وبيعيط وبيحب وبيكره وهو مش مدرك بكل ده رغم أنه بيأثر فينا وممكن نبكى ونضحك معاها .
ولكن انت بلياتشو انسان لابس وش بيضحك ومن جواه ممكن يكون بيعيط وهى دى مشكلتك انك انسان جواه مشاعر ممكن تكون أفراح وممكن تكون أحزان .
لأنك إنسان ليه مشاعر واحاسيس مش جماد حد بيحركه غيره وهو مش مدرك باللى بيعمله .
إنسان بيأدى مهمة محددة ومطلوب أنه يأديها وبس ومش مهم هو إيه إللى هو جواه ومش مطلوب ان حد يحس غير إللى السيناريو بيقول عليه ومايحسش باللى جواه .
ودى اصعب مهمة انك تأدى دور مرسوم مطلوب منك انك تاديه حتى لو كان ده ضد مشاعرك وتستمر فيه لحد نهايته لأنك مش جماد .
شئ صعب ان حد يحركك فى اتجاه معين وتكون انت زى العروسة مشدود بحبال مكتفاك وبتحركك زى ماهى عايزة وانت مستسلم لها ومش قادر تقاوم .
ليست هناك تعليقات:
إرسال تعليق