جرب وحاول واغلط هتتعلم ، هتخاف من الغلط هتفضل مكانك واقف ومش هتتقدم ، الدنيا عايزة انك تحاول وتغلط وتعدل وتحاول تانى وتغلط وتعدل لحد ما توصل للى انت عاوزه .
مافيش حد وصل من اول محاولة ، عشان توصل محتاج تحاول كتير وماتيأسش لحد ما توصل ، كل إللى مطلوب منك انك تحاول ماتستسلمش وماتوقفش فى نص الطريق أو ترجع ، كمل المشوار للآخر .
وبص للطفل الرضيع وإصراره رغم ضعفه وقلة خبرته ازاى بيحاول انه يمشى ومهما وقع بيقوم ويحاول بإصرار وعزيمة لحد فى الآخر مابيقدر يمشى ، اتمسك بعزيمة الطفل إللى جواك ، انت كنت فى يوم من الأيام طفل بس انت اللى نسيت ده لما كبرت .
انت مش هتقدر تفتكر لما كنت بتحاول تتكلم وانت طفل فكنت بتقول كلام يضحك وكل إللى حواليكبيضحكوا على كلامك بيضحكوا بس ساعتها انت ماهمكش ضحكه وفضلت تحاول تتكلم زى إللى ضحكوا عليك لحد ماتكلمت زيهم .
راقص الباليه إللى بيرقص على أطراف صوابعه اول ما حاول يمشى وقع وهو طفل زى كل الأطفال وفضل يحاول لحد ما قدر يمشى وبعد كده فضل يدرب نفسه ويحاول فى التدريب ويتعلم من غلطه لحد ماوصل انه يرقص باليه ويبهرك .
الشاعر إللى بينظم الكلام ويرتبه وبيقف يقوله بطلاقة وسلاسة وهو طفل كان زيه زى أى طفل بيقول كلام مش مفهوم وكلام بيضحك وفضل يتعلم لحد ماقدر ينظم الكلام ويرتبه يوقف يقوله كمان ويبهرك .
لو راقص الباليه استسلم من أول واقعة وهو طفل كان زمانه قاعد على كرسى متحرك وهو سليم يقدر يمشى ، ولو الشاعر يأس لما لقى الناس بتضحك على كلامه وسكت كان زمانه بقى أخرس وهو يقدر يتكلم .
فحاول هتوصل بإذن الله فماتستسلمش وصحى إصرار الطفولة جواك وفطرتها وإستمر وماتوقفش وكمل .
المقالات
أحمد البوهى
ليست هناك تعليقات:
إرسال تعليق