قوة دفع العكاز

يسير جدو مع حفيدته فى الحديقة وهو يقول : ولد فاكر نفسه ظريف 

يظهر الولد فجأة ويقول : نعم ياجدو 

- انت تانى

- أه 

- وعاوز ايه ياظريف 

- أنا مش عاوز حاجة ، انت إللى ناديت علىَّ

- أنا ماناديتش على حد 

- لأ أنا كنت ماشى جنبك وسمعتك وانت بتقول يا ظريف 

- أنا كل إللى قولته ولد فاكر نفسه ظريف 

- أنا مش فاكر نفسى ظريف لأن أنا فعلا ظريف 

- يابنى بطل رخامة وسيبنى فى حالى ، أنا جاى الجنينة دى علشان اشم شوية هوا نضيف ، مش جاى عشان ترخم علىَّ يارخم

- ياجدو انت إللى ناديت على 

- يابنى أنا ما أعرفكش أصلا عشان أنادى عليك 

- بس انت قولت ظريف وأنا اسمى ظريف 

- يا سيدى أنا أسف وأوعدك مش هاقول ظريف بعد كده وكمان عمرى ماهأقول بيستظرف أو ظرافة أو أى كلمة تشبه إسمك بعد النهاردة ، سيبنى فى حالى بقى 

- ليه كده بس ياجدو دانا إرتحت لك أول ما شفتك وحبيتك 

- وأنا اول ماشفت كان نفسى أديلك بالقلم بس خفت إنك تموت منه وتتحسب على بنى آدم وأخش بسببك السجن 

- إضرب انت بس ياجدو وماليش دعوة وأنا أقول لهم إنك مش انت إللى ضربتنى

- يابنى مش هتقدر تتكلم لأنك هتبقى ميت 

- ولا يهمك ياجدو هاكتب جواب وأقول فيه انى انتحرت يللا ياجدو إضرب 

- يابنى امشى من قدامى أحسن لك بدل ماضربك بالعكاز ألزقك فى حيطة بيتكم إللى ماعرفش هو فين أصلا 

- ياسلام ياريت تعملها ياجدو وأهو تبقى توصيلة لحد البيت ببلاش بقوة دفع العكاز ، ههههههه

تغضب حفيدته من  الرخم ده فتقرر أن تنتقم منه فتربط حبل كان معها فى قدمه وتربط الآخر بكرسى من كراسى الحديقة أثناء انشغاله فى الحديث مع جدها وبعد ان تنهى المهمة تسير هى وجدها فيحاول اللحاق بهما فيقع على الأرض بسبب الحبل المربوط برجل الكرسى ورجله فتضحك هى وجدها  عليه ويبتعدان عنه ويجلسان فى مكان آخر بالحديقة .

هيرجعنى لأيام الشقاوة 

أحمد البوهى