راسى راحت فين

راسى راحت فين انا كنت سايبها فوق كتافى و دلوقتى مش لاقيها ياريت لو حد شافها يرجعهالى عشان انا محتاجها ضرورى .

راسى دى اهم حاجة عندى من غيرها ماحدش هيعرفنى لانها راسى مش رأس حد تانى ، فارجوكم يا جماعة إللى شاف راسى يرجعهالى لانها مش هتنفع حد صدقونى هى اصلا كانت نفعتنى عشان تنفعكم دى رأس مالهاش لازمة صدقونى  .

بس هى ضرورية بالنسبالى لانها راسى وما اقدرش اعيش من غيرها .
 فازاى هتعرفنى الناس من غير راسى ، الناس مش هيعرفونى ومن البلد هيطردونى وهيعتبرونى غريب ومش هيصدقونى لانى مش هاعرف اتكلم وأوضح لهم الحقيقة لانى بُقى  مش موجود لانه جوا راسى اللى ضاعت منى .

ومش هاعرف حتى اشوفهم وانا معاهم عشان عيونى جوا راسى يعنى ياخونا من غير راسى هاتوه ومش هاعرف حتى ارجع لبيتى. 

فلو حد شاف راسى ياريت يرجعهالى ماهى راس شقية ومجننانى وكل شوية تسيب رقبتى وأكتافى وتروح منى وأفضل ادور عليها لحد مالقيها وبعدين ترجع تضيع منى تانى . 

وياريت لو حد عنده لزق كويس مايفكش يلزقها فى رقبتى بيه عشان ماتفكش منى تانى وتسبب رقبتى واكتافى .

انتو ليه بتضحكوا على هو انا باقول نكتة عشان تضحكوا انا بادور على راسى إللى ضاعت منى من كتر إللى حصل لى وشوفته فى الدنيا الغريبة دى إللى مجننانى .

سمعت طفل صغير بيشاور ويقول ماراسك اهيه فوق كتافك يا عمو حطيت ايدى عليها لاقيتها موجودة فرحت وقولت اه ياراس ياشقية بتروحى وتيجى لوحدك يامجننانى .

جريت على الطفل وشكرته وبوسته ولما بصيت حواليا لقيتهم بيضحكوا وماعرفتش ايه السبب فسبتهم ومشيت فرحان ان راسى رجعت لى من تانى .
المقالات 

أحمد البوهى