هدية عيد ميلاد مراتى

يقف عاطف العاطفى فى محل مجوهرات ويعرض الجواهرجى مجموعة من الخواتم عليه ليختار واحداً ومن المجموعة يعجبه أحدهم فيقول : ده خاتم جميل ممكن تكتب اسم مراتى عليه عشان أنا جايبهولها هدية بمناسبة عيد ميلادها

الجواهرجى : ماشى بس كل حرف بمائة جنيه 

- بس للأسف كل إللى فاضل معايا مائتين جنيه بعد ما هادفع تمن الخاتم عموماً كمل من الفيزا ويعطيه الفيزا ليكمل باقى المبلغ ولكن تخرج ورقة من الفيزا تقول أن رصيده قد نفذ فيقول له : ما ينفعش تخفضه لمائتين جنيه

- للأسف هى دى اسعارنا
يفكر قليلاً ثم يقول ،:

خلاص اكتب أول حرفين من اسمها

ويكتب الجواهرجى اول حرفين من إسم مراته على الخاتم ويضعه فى علبة قطيفة جميلة ويعطيها له فيأخذها عاطف العاطفى سعيدا ويركب سيارته ويعود لبيته سعيداً بالخاتم وفى المساء وهو جالساً معاها جلسة رومانسية يُخرج العلبة القطيفة ويُعطيها لها فتفرح زوجته بالهداية وتقول له : أول مرة تعمل حاجة صح واضح انك اتعلمت ازاى تتعامل مع مراتك وزاى تسعدها 

وتفتح العلبة وتلبس الخاتم سعيدة به فيقول لها أقرئى إللى مكتوب عليه فتخلع الخاتم من يدها وتقرأ المكتوب عليه فيملأ الغضب وجهها وترمى الخاتم فى وجهه وهى تقول : يا ريتك ما قولت لى اقرى إللى مكتوب عليه انت مافيش فايده فيك هنفضل ما بتفهمش كده حرام عليك ياخى 

فيقول لها : ليه ياحبيبتى زعلانه كده دا أنا جايب لك خاتم هدية 

- وايه إللى انت كاتبه عليه ده 

- إسمك ياحبيبتى 

- أنا إسمى " سِمّْ " انت بتهزقنى وبتسخر منى فى يوم عيد ميلادى

وأُحرج عاطف أن يحكى لها السبب وانه أُضطر ان يكتب حرفين فقط من إسمها لانه لم يكن معه المال الكافى لكتابة كل أحرف إسمها " سمر " وأنه قد تأخر فى شراء هدية عيد ميلادها ولم يكن لديه وقت لتدبير باقى المبلغ والفيزا التى معه كان قد استهلك كل ما فيها من رصيد ومن غيظها أخذت الخاتم من على الأرض  ووضعته فى فمه ومن قوة إندفاعه فى فمه يبلعه  .

حكايات عاطف العاطفى 

أحمد البوهى