ذهب ليصطاد الديناصور 

يقول الأستاذ : طب على جه ولا لأ

- جيت يا أستاذ 

- طب ليه مارديتش 

- كنت مشغول بالتفكير فى مسألة فلسفية معقدة 

- وايه هى المسألة الفلسفية المعقدة إللى شغلتك عن التركيز معايا 

- كنت بأفكر فى ماذا لو لم يحدث شيئا فى تلك البقعة من العالم ؟

- عن اى بقعة تتكلم 

- تلك الموجودة فى رأسى 

- هو فيه بقعة فى رأسك 

- أه يا أستاذ 

- وجت منين البقعة دى 

- كنت أجلس بالأمس فى الفراغ أتأمل الهواء الساخن النابع من الجليد فى القطب الشمالى فسقطت بقعة زيت فى رأسى 

-ايوه أنا فاهم ولكن من أين أتت ؟
- من حيث تأتى الأشياء
- وماذا حدث بعد أن أتت ؟

- لم يحدث شئ

- طب بص بقى انت هو احنا لسه فى أول العام الدراسى ولسه بنتعرف على بعض فكل واحد فيكم لازم يركز فى اللى بأقوله 

- ماشى يا أستاذ 

- وبالنسبة للاتنين اللى استظرفوا دول كل واحد منكم يجيب ولى أمره بكره معاه
يرفع على أصبعه ويقول : لن يحضر والدى معى للأسف غدا 

لماذا ؟

- لأنه موجود فى الصحراء البعيدة الغارقة فى عمق التاريخ ليصطاد الديناصور الذى لم يعد موجوداً .
ويرفع صديق إصبعه ويقول : وأنا والدى ذهب إلى نفس الصحراء ليتأكد ان الديناصور فعلاً لم يعد موجود لأنه دخل مع والد صديقى على فى تحدى لانعرف له نهاية ولا نعرف سببه على الإطلاق .
فيقول المدرس لهما : ياريت ياولاد لو قدروا يلاقوا الديناصور ابقوا خلونى اشوفه لان أنا نفسى أشوف الديناصور .

ليه مارديتش من الأول

حكايات الأستاذ

أحمد البوهى