أين العصا

يكلم الفأر صديقته فى التليفون فيقول : انت ليه ماجتيش بقالى ساعة مستنيكى

- خايفة ليكون كورونا بيصيب الفيران كمان 

- والله مابيصيبش غير البنى آدمين

- طب مانستنى شوية لحد ما الموضوع ده ينتهى 

- طب عشان تطمنى تعالى نروح لدكتور ونستشيروه .

أين العصا

فى عيادة الدكتور يتسلل الفأر وصديقته من الشباك ويجلسان على المكتب فى انتظار وصوله وعندما يدخل الدكتور يجد الفأر وصديقته فيقول : انت دخلوا هنا ازاى 

ويجرى ويحضر عصا ويجرى خلفهما وهما يجريان منه ويقول الفأر : إسمعنى بس يا دكتور احنا جاينلك فى استشارة 

- استشارة ايه هو انا دكتور حشرات 

- عيب تقول كده يا دكتور احنا حيوانات مش حشرات 

- حيوانات حشرات أخرجوا من عيادتى فوراً 

وظل يطاردهما والفأر يحاول إقناعه بأن يستمع له والدكتور يحاول أن يضربه بالعصا التى معه فيصعد هو وصديقته إلى سقف العيادة بسرعة لتفادى ضربات العصا ويقول له الفأر : أهدى بس يا دكتور وإسمعنى 

فيخلع حذائه  ويضربه به وهو يقول : مش هأسمعك وأخرج انت والبتاعة إللى معاك دى من هنا فوراً

وينجح الفأر فى تفادى الحذاء ويجرى هو وصديقته على الحائط ويخرجا من الشباك الذى دخلا منه
وفى الخارج يقفان على الحائط وتقول صديقته له : عجبك إللى حصل لنا ده
- عادى ما أحنا طول عمرنا لما بيشفونا البنى أدمين بيجروا ورانا وبيحاولوا يموتونا
- طالما انت عارف كده ليه جبتنا عند واحد منهم
- خلاص بقى ماتكبريش الموضوع  انا كان كل همى انى اقنعك ان كورونا مالوش علاقة بينا خالص .
يحاول الإقتراب منها فتقول له : ابعد عنى أنا مخصماك والحق علىَّ انى سمعت كلام واحد مجنون زيك .
حكايات الدكتور
حكايات الفأر

أحمد البوهى