الضيف الغلس الى ما بتعرفش تتخلص منه
الضيف إللى يجى ويلبد عندك فى البيت وكل ماتحاول تخلص منه تلاقيه يلزق وما يتحركش من مكانه ولما تقوله : أنا نازل اشترى حاجات من السوق
يقولك : اتفضل أنا قاعد مستنيك بس ماتتأخرش
فتقول له فى غضب : لأ هتأخر
- براحتك انا هأقعد أتفرج على التلفزيون لحد ما ترجع
- بس أنا يمكن أسافر بكره ان شاء الله
- سافر وأنا هأقعد اهو أستناك وكمان أحرس لك الشقة لأن اللصوص كتير قوى اليومين دول
- طب انت هتمشى امتى
- وانت ليه عايزنى أمشى هو أنا مضايقك ولا حاجة ؟
- بصراحة أه
- هههه يا راجل انت اكيد بتهزر
- بس أنا مابهزرش
- يا رجل احنا عشرة عمر وأنا عارف انك بتهزر
- عشرة عمر منين وانا مايعرفتكش إلا من كام شهر وكانت معرفة زفت
فيضحك فى سذاجة ويقول : بطل هزار لأحسن أصدق وأزعل منك واختفى من حياتك خالص
فتقول له فى : ياريت ده يبقى أسعد يوم فى حياتى
بيضحك مرة أخرى فى سذاجة ويقول : انت مش كنت بتقول انك نازل يلا قوم انزل عشان تشترى إللى انت عاوزه من السوق
وتقوم وتتركه فى البيت وتنزل وفى الشارع تقفز إلى ذهنك فكرة للتخلص منه فتذهب لشتريتها وتعود للبيت سعيدا وتنتظر حتى يدخل الحمام وتدخل وتضعها على السرير وفى المساء عندما يدخل لينام يجد السلك الشائك الذى اشتريته يملأ السرير فينام على الأرض وتفتح الباب فتجده نائماً على الأرض فتشعر بالسعادة وتطمئن وتنام وانت منتظر ان يأخذ شنطته فى الصباح ويرحل .
وفى اليوم التالى يخرج من غرفته ويقول : انا نمت امبارح على الأرض وجسمى كله اتكسر
- وليه مانمتش على السرير
- ماعرفش مين المؤذى إللى حط سلك شائك عليه ولما حاولت أشيله لاقيت شابك فى المرتبة فنمت على الارض
- معقولة
- ايوه فممكن ابقى انام جنبك النهاردة لحد ما نشوف هنشيل السلك ده من المرتبة ازاى ؟
ليست هناك تعليقات:
إرسال تعليق