المغامرات والمواهب الخارقة

فيه ناس لما تقعد معاها بتقعد تحكى لك عن مغامراتها ومواهبها الخارقة ويحاولوا يقنعوك انهم يقدروا يصلحوا خرم الأزون وينقلوا الجبل من مكانة لو أتيحت ليهم الفرصة ومن كتر كلامهم عن مواهبهم الخارقة دى وحكايتهم العجيبة إللى مايصدقهاش طفل صغير بتشعر بالملل وتحس ان الوقت واقف مابيتحركش ويبقى نفسك تدفع الوقت عشان يتحرك ويعدى بسرعة عشان تخلص منهم ومن حكاياتهم العجيبة إللى عمالين يحكوها وفى لحظة من الضيق الشديد والملل تقول له  :  بس إللى أنت بتقوله ده صعب انه يحصل وأنا مش قادر أصدقه فتلاقية يضحك ببرود ويقولك : أنا عارف ان اللى بأقوله مش من السهل إن حد يصدقه لأنه غريب بس فعلاً حصل وعموماً هاحكى لك حكاية تانية أغرب من الحكاية دى وأنا عارف انك مش هتصدقها برضو رغم أنها فعلاً حصلت .

فتلاقى نفسك بتصرخ جواك وبتقول : أنا لسه هاستحمل حكاية تانية من حكايتة الغريبة دى وتبدأ تلوم نفسك انك كذبته فى الحكاية الأولى فاتسببت فى انه يحكى لك حكاية تانية أغرب من الأولى ومطلوب منك انك تصدقه . 

وفى النهاية تلاقى نفسك مستسلم للحكاية التانية من غير ما تجادله ولا نناقشه يمكن مايحاولش يحكى لك حكاية تالتة . 

وبعد ما يخلص وتسكت عشان يسكت تلاقية دخل فى الحكاية التالتة مباشرة . 

المقالات  

أحمد البوهى