انت ليه عملت كده ؟
يذهب مدبولى لزيارة صديقه عريان وعندما يدخل عليه يجده جالساً عرياناً فيسأله : أنت ليه مالبستش الجلابية إللى انا جبتها لك ؟
- وأول ما يراه عريان يضع يده على فمه ويقول له : أنت ليه مش لابس الكمامة
- معاك حق ويلبسها
- ينفع يبقى عندك كورونا وتمشى من غير كمامة وتعدى الناس
- بس أنا ماعنديش كورونا وصحتى الحمد لله تمام
- يمكن عندك وانت مش عارف
- بس انا لا بكح ولا جسمى مكسر
- انت متأكد
ايوه وبعدين انت ليه ماجاوبتش على سؤالى وفين الجلابية إللى انا جبتها لك ؟
- ابن الطويل جه وخدها منى
- آه جه عندك وخدها منك بالعافية
- لأ أنا اديتهاله بمزاجى
- وليه تعمل كده ؟ ( يقولها بعصبية )
- لأنه قال لى انك عندك كورونا وخد الجلبية عشان الطويل يعقمها لى
فيقول فى عصبية شديدة : ماكنت تغسلها يا...... ولا بلاش ده انت شخص مستفز ... فيه حد عاقل يعمل كده !!
- يعنى كنت البسها واتصاب بكورونا
- انت هتتجننى كورونا ايه ؟ ومش ده الراجل إللى خد كل حاجة منك قبل كده لما ضحك عليك وقال لك سيب باب الشقة مفتوح والدنيا أمان
- أه وحتى باب الشقة خدوا
- يبقى ازاى تسمع كلامه تانى ؟
- لأنه مش هو إللى قال لى
- طب مين إللى قاللك
- ابنه
- انت هتجننى والله هتجننى وتجننى ليه ما هاقوم أمشى ومش السلامة عليكوا كمان ، بعد كل إللى عمله فى الطويل يديله الجلابيه!!.
أحمد البوهى
ليست هناك تعليقات:
إرسال تعليق