خد بالك من الفكرة واخوتها
 |
| خد بالك من الفكرة و أخواتها |
وانت قاعد فى حالك تلاقى فكرة سيئة هاجمتك وبتحاول تسيطر على عقلك ولو ماخدتش بالك ان الفكرة دى دخلت عقلك عشان تستكشف مدى استجابتك ليها هتسيطر عليك وشوية هتلاقيها جابت اخوتها وهيقعدوا يتسلوا عليك .
وده لأنك يا مسكين ماخدتش بالك منها أول ماهاجمتك وسيبتها جواك لحد ماسيطرت عليك وشلت كل تفكيرك وخلت كل تركيزك معاها وفى اللحظة دى أتطمنت وبعتت جابت كل اخوتها وبقى عقلك مكان يقدروا يعيشوا فيه بأمان ويتلاعبوا بيك .
وانت بتعانى وهما مستمتعين وقاعدين فى عقلك إللى بقى مسكنهم عمالين يضحكوا عليك لأنك من البداية ماواجهتش الفكرة اللى جت فى الأول تستكشفك ولما عرفت انك ضعيف فتحت الباب لكل اخوتها عشان يدخلوا عقلك ويخلوك تفضل تعانى وهما مبسوطين من المغفل إللى سيطروا عليه .
ولما يسيطروا عليك تماماً بيجيبوا الخوف أبوهم عشان يدخل فى عقلك ويعيش معاهم وتفضل فى حالة رعب بسبب وجوده فى عقلك معاهم .
والأفكار السيئة دى زى الفيروسات بتتشكل بشكل صوتك وبتحس انها انت زى الفيروس مابيخدع الخلية وبيوهما انه من نوعها لحد مايسيطر عليها ويأذى الجسم كله .
فلازم تكون واخد بالك من عقلك وتسيطر عليه وتفرز الأفكار إللى بتدخل جواه وماتسيبش بابه مفتوح لأى فكرة تخش فيه ولو دخلت فكرة سيئة اطردها فوراً قبل ماتجيب اخوتها وأبوها ، عشان تعيش سعيد .
أحمد البوهى
ليست هناك تعليقات:
إرسال تعليق