لكل شئ ميعاد مقدر ومحسوب 

ماتستعجلش ، أيوه ماتستعجلش وخلى كل حاجة تاخد وقتها لحد ماتظهر للنور وتبقى واقع تعيشه .

الفلاح بيرمى البذرة فى الأرض ويفضل يرعاها كام شهر وهو عارف انه هيجنى المحصول لما يجى وقت الحصاد .

ايوه لكل حاجة وقت واحنا كل إللى علينا عشان نحصل على الحاجة دى اننا نعمل إللى مفروض يتعمل وننتظر يوم الحصاد .

وكل ما اجتهدنا فى العمل كل ما كان إللى هنحصده أفضل ، لإن النتيجة النهائية بتكون على قد إللى بتبذله من جهد وتعب .

فاعمل إللى عليك ماتستعجلش وكون زى الفلاح ارمى البذرة وارعاها وإنتظر يوم الحصاد عشان تحصد نتيجة تعبك وجهدك .

كل إللى نجحوا قبلك عملوا كده  ،  عملوا واجتهدوا وبعد فترة حصدوا .

ماحدش بيلاقى النتيجة فى نفس اللحظة إللى ابتدأ فيها لان لكل شئ وقت لحد ما تحصل عليه ويظهر فى حياتك كواقع . 

أنت نفسك إتولد طفل مابيعرفش أى حاجة وفضلت تكبر وتتعلم لحد ما بقيت إنسان فاهم وقادر يعتمد على نفسه ، مافيش حد إتولد كبير ، لا فى الإنسان ولا فى الحيوان ولا فى النبات ، كله بيتكلم صغير بيكبر مع الوقت . 

ومافيش حد بقى دكتور ولا مهندس بعد ما خلص سنه ولا سنتين فى المدرسة عشان تحترف أى مهنة محتاج لوقت من التعلم  لحد ماتتقن المهنة دى . 

فاعمل إللى عليك وأكيد هتوصل لنتيجة عملك فماتستعجلش .

المقالات

أحمد البوهى