الصابونة لازم تقعد شهرين فى الحمام

يدخل البخيل على زوجته وهو فى حالة ثورة عارمة ويقول لها غاضباً : فين الصابونة اللى كانت فى الحمام ؟

فتقول زوجته له فى سخرية : صاااابونة انت بتسمى حتة الصابون الصغيرة دى صابونة !!

فيقول فى غضب: طالما لسه بترغى وبتغسل الايد تبقى صابونة أنا عاوز أعرف هى راحت فين

تقول فى سخرية : أكلتها

فيقول فى عصبية : هو فيه حد عاقل بياكل صابون !!

- اه أنا مجنونة وأكلتها ايه رأيك بقى

- خلاص انت كده تبقى فطرتى وماتطلبيش منى فلوس للفطار

- يا راجل يانتن دى كانت مجرد حتة صابونة صغيرة قد التعريفة وأول ماغسلت بيها ايدى باشت ودابت فى المية

- ماهى باشت علشان بتقعدى تفركى ايدك فى الصابونة نص ساعة

- انت عاوز ايه دلوقت منى ؟

- عاوزك تراعى ربنا شوية مش كل شهر أشترى صابونة ده حرام والله هو أنا بلاقى الفلوس

- طب الصابونة وخلصت انت عاوز ايه ؟

- عاوز أقولك ان مافيش صابون هيدخل البيت لمدة شهر ، ولازم تعرفى ان من النهاردة الصابونة لازم تفضل فى الحمام لمدة شهرين .

أحمد البوهى