مسكه من بنطلونه لأنه مش طايل كتفه 

يقابل الطويل توفيق فى الشارع بعد خروجه من السجن فيقول له : إقلع هدومك أنا عاوزاه

فيقول له فى غضب : انت عاوز تقلعنى هدومى أنا 

- أه إقلع 

- طب لو رفضت أقلع هتعمل ايه ؟ 

- لأ انت هتقلع بالذوق دلوقتى

- طب مش قالع 

- ليه عاوز تخلينى أبقى عنيف معاك ؟

و فى القسم يقف توفيق عريان ويقول للشاويش : يرضيك ياشاويش الطويل يقلعنى هدومى كده هو عشان طويل يقلع الناس هدومها

فيقول الشاويش فى غضب : هو الراجل ده مش عاوز يبطل العادة دى 

- أنا ماليش دعوة ياشاويش بالكلام ده أنا عاوز هدومى 

فيقول الشاويش فى غضب : ماشى يا طويل أنا هأعرف ازاى أبطلك العادة دى

- ياشاويش أعمل فيه إللى انت عاوزه ، أنا عاوز هدومى أنا ماحدش خد منى حاجة قبل كده 

- طب تعالى  معايا عشان تاخد هدومك 

- يعنى لما اجى معاك هتجيب لى هدومى

- أيوه تعالى 

وفى بيت الطويل يقول الشاويش له فى غضب : أنت هاتبطل العادة دى ولا لأ

فيقول الطويل : عادة ايه ياشاويش ؟ 

- انك تخلى الناس تقلع هدومها

- أنا بطلتها خلاص ياشاويش من ساعة ما دخلت الحجز 

ينادى على توفيق  حيث قد طلب منه أن ينتظره بالخارج ويقول له : أدخل ياتوفيق 

وعندما يدخل يقول له : طب مين إللى خد هدوم الراجل ده ؟ 

فيقول الطويل لتوفيق : يعنى أنا أهزر معاك تقوم تروح تشتكينى للشاويش

فيقول له توفيق فى غضب : هو أنا أعرفك عشان تهزر معايا 

فيقول الشاويش : له هات هدوم الراجل وراجعها له 

وبعد أن يعيد الهدوم لتوفيق ويلبسها يمسكه الشاويش من بنطلونه ويقول له : قدامى على الحجز 

فيقول الطويل له : وهامشى ازاى وانت ماسك بنطلونى كده 

- ماهو ده إللى انا طايل امسكه فيك ، لإن كتفك بعيد قوى ومش طايله ومس ذنبى انك طويل كده 

- وأنا مالى ياشاويش ربنا هو إللى خلقنى كده

- طب إمشى قدامى على الحجز يامجرم .

مسكه من بنطلونه لانه مش طايل كتفه 

أحمد البوهى