بيطالبوا باعدامه فى ميدان عام
 |
| بيطالبوا باعدامه فى ميدان عام |
تقف المذيعة فى حجز القسم وتقول : أنا النهاردة هنا عشان هاعمل حلقة مختلفة وهاحاول أعرف ايه سبب وجود الناس دى هنا ؟
ويقترب ظريف منها ويقول : ممكن اتكلم
فتقول له : عاوز تقول ايه ؟
فيقول لها : أنا ظريف وعاوز أقول نكتة للسادة المشاهدين
تقاطعه وتقول له : إحكى لنا الأول ايه سبب وجودك هنا ؟
- النكت سيادتك
- يعنى انت سبب وجودك هنا النكت وعاوز تقول نكتة للمشاهدين !!
- أه سبب وجودى هنا انى بأحب أقول نكت
- طب ممكن توضح لى وللسادة المشاهدين إللى بيشوفونا دلوقتى ايه علاقة انك بتحب النكت بوجودك هنا
- حاولت أقول نكتة للشاويش فراح جايبنى هنا
- بس إللى أنا أعرفه أن مافيش قانون فى البلد بيمنع النكت
- هو ده إللى حصل معايا بالظبط
- بس ده سبب غريب قوى لدخولك هنا أكيد فيه سبب تانى
- للأسف هو ده السبب
- طب قبل ماتقول لى النكتة تقولى مين ضربك كده ؟
- المساجين هما إللى ضربونى
- وليه ضربوك بالشكل ده ؟
- عشان قولت لهم نكت
- برضو
- أه
- هو ايه حكايتك مع النكت
- مش عارف بس كل ما قول نكتة لحد يحصل لى كده لدرجة انى روحت لمنتج عشان أمثل كوميدى ولما عملت له مشهد من تأليفى قام معلقنى فى شباك مكتبه
- طب ممكن تسمعنى نكتة
فيقول فى سعادة : والنكتة بتاعتى هتطلع فى التليفزيون
- اه يلا قول
- مرة كان فى واحد هههههههه
- انت ليه سكت ما تكمل النكتة ؟
- النكتة كده خلصت
فتنظر له فى غضب ثم تقول فى المايك : بعتذر للسادة المشاهدين عن إللى حصل ده أنا فعلاً أسفة ... والإعداد بيقول لى ان كتير من السادة المشاهدين على صفحة البرنامج على الانترنت بيطالبوا بإعدامه فى ميدان عام وأنا شخصياً بأيدهم فى طلبهم ده .
أحمد البوهى
ليست هناك تعليقات:
إرسال تعليق