بيطلب منه يروح المريخ بطيارة
 |
| بيطلب منه يروح المريخ بطيارة |
أثناء سير مدبولى فى البلد يجد مكى منهمك فى عمل الصاروخ فيتوجه إليه بيسأله: انت بتعمل إيه يابنى؟
فيقول مكى فى غضب: وبعدين بقى فى السؤال إللى مش عارف أخلص منه ده
- انت زعلان ليه يابنى أنا عاوز أعرف ايه الشئ العجيب ده
- الشئ ده ياوالدى هيغير شكل العالم
- يعنى هيخلى العالم شكله عامل ازاى يعنى؟
- هيخليه فوشيا ياوالدى
- وايه الفوشيا دى يابنى؟
- ده أكل ياوالدى
- وايه علاقة الأكل بشكل العالم؟
- ياوالدى أنا بأهزر معاك ده صاروخ وهاطلع بيه للمريخ
- وهو المريخ محتاج صاروخ يابنى؟
- طب هاروح له ازاى؟ بالقطر
- لأ طبعاً هاتروح المريخ بالقطر، ما ينفعش طبعاً
- خلاص سبنى أخلص الصاروخ إللى مش عاوز يخلص ده عشان أروح للمريخ
- وليه يابنى تتعب نفسك وتعمل صاروخ؟ ما تسافر بالطيارة
فينظر له متعجباً ويقول: يعنى انت عاوزنى أسافر المريخ بطيارة
- أه انت ليه مستغرب قوى كده وواضح ان كلامى مش عجبك
- كلامك على رأسى ياوالدى، وانت معاك حق أنا هاروح المريخ بطيارة ممكن تسيبنى بقى
- أنت ولد مؤدب وبيستمع الكلام- شكراً ياوالدى سيبنى بقى فى حالى لو سمحت
- بص انت علشان ولد مؤدب هأقول لك ازاى تروح المريخ
- اقول وخلصنى
- انت تروح المطار وتقطع تذكرة للسودان ولما تصل السودان تسأل فين نادى المريخ بتاع الكُرة والف من هيدلك لأنه نادى كبير ومشهور جداً هناك
فيقول مكى بعصبية: أنا عاوز أروح بصاروخ
فيقول مدبولى له ببرود: خلاص انت حر، أنا نصحتك وانت إللى عاوز تتعب نفسك على الفاضى وتركه ويمشى وهو يقول: الواحد يروح القمر بصاروخ مقبولة لكن يروح السودان بصاروخ أيه الجنان ده.
أحمد البوهى
ليست هناك تعليقات:
إرسال تعليق