لا يمكن حد يقدر يخليه يعمل زى القرد 

أثناء سير صاحب القرد فى أحد شوارع البلد يقع عليه فرع شجر وعندما ينظر لأعلى يجد القرد الذى هرب منه فيقول له : انزل نتكلم مع بعض.. انزل يا حبيبى.. انزل ماتخافش أنا مش هأذيك.. انزل وانا أجيب لك موز وسودانى وأجيب لك كل حاجة انت بتحبها.. يلا انزل 

ولكن القرد ينظر له ولايتحرك من مكانه فيقول له : واضح أنك لسه زعلان منى طب أطلع لك أصلحك ولا تنزل انت عشان أصلحك.. انزل يلا عشان أصلحك لانى ندمت على كل إللى كنت باعمله فيك يلا انزل يا حبيبى فيقتنع القرد بكلامة وينزل من الشجرة فيمسكه صاحبه ويقول له : أنت لو فاكر انى صحيح ندمت على إللى عملته فيك تبقى مغفل يلا أرقص وغنى يلا قول الليل الليل الليل ياميمون الليل الليل وأكون ممنون وفى تلك اللحظة يخلع القرد رأسه فتظهر رأس ابن الطويل ويقول له : أنت فاكرينى القرد بتاعك ده أنا كنت متنكر... أقلع الهدوم بتاعتك عشان بابا عايزها 

فيقول صاحب القرد له : أسمع يا واد انت أنا مجنون وممكن أعملها معاك

فيسمع صوت يأتى من أعلى ويقول له : ورينى هتعمل معاه ايه ؟ 

فينظر لأعلى فيجد الطويل فيقول له : ولا حاجة يا سعادة الطويل باشا كل ما فى الأمر كنت هأقوله نكتة وبعدين أقلع   

طب إقلع وإعمل زى ماكنت عاوز القرد يعمل فيقول له فى غضب : أقلع أه لكن أعمل زى القرد لا أنت ولا عشرة زيك يخلونى أعمل كده  

وبعد فترة يمر عليه مدبولى فيقول له : انت ليه بتتنطت وعمال تقول الليل الليل الليل ياميمون وانت عريان كده أكيد الطويل قابلك وخد هدومك 

- أه 

- وهو إللى خلاك تتنطت وتغنى الأغنية دى 

فيقول له فى غضب : أنا ماحدش يقدر يجبرنى أعمل زى القرد 

فينظر له مدبولى ببرود ويقول : أيوه ماهو ده إللى انا ملاحظه برضو .

لايمكن حد يخليه يعمل زى القرد 

أحمد البوهى