هنبقة بيلبس هدومه

يقف صديق هنبقة أمام باب غرفته ينتظر خروجه ويقول له: هنبقة انت اتأخرت ليه جوه يلا أخرج بقى عشان مانتأخرش على المشوار بتاعنا 

- حاضر هاخرج دلوقتى 

- طب انت بتعمل إيه كل الوقت ده ياهنبقة فى الغرفة؟

- بالبس هدومى 

- أه يعنى بتعمل ايه؟

- بالبس هدومى يامتخلف 

- أيوه يعنى انت بتعمل ايه؟

- انت مابتفهمش بأقولك بالبس 

- بأفهم والله بس مش عارف انت بتعمل إيه جوه الغرفة؟

- وبعدين بقى فى الغباء بتاعك ده بأقول لك بالبس 

- هو لبس الهدوم يعتبر عمل

- ايوه 

- طب مش تقول لى عشان أعرف 

- خلاص عرفت 

- أه بس انت بقالك نص ساعة بتلبس 

- هو ده العادى بالنسبة لكل البنى آدمين

- بس أنا بالبس فى خمس دقايق

- هو انت فاكر نفسك بنى آدم 

- شكراً ياسيدى طب وهاتخلص لبس امتى؟

- دلوقتى حالاً

وينتظر صديقه فترة ولكن هنبقة لايخرج فيقول صديق له: خلصت لبس ولا لسه؟

- لسه 

وفى تلك الأثناء يسمع صديقه صوت شخير فيقول له: أنت نمت ياهنبقة

- لأ بالبس هدومى

- أنت بقالك ساعة بتلبس فى هدومك

- خلاص قربت أخلص

فيفتح صديقه الباب وهو يقول: ليه انت بتلبس... قبل ان ينهى كلامه يجد هنبقة نائماً على سريره بيشخر وبجواره ببغاء يقول له: أنا لسه بالبس بأقول لك بالبس 

فينادى صديقه عليه ويقول: أنت دخلت تلبس ولا تنام ياهنبقة؟

فيقول هنبقة بعد أن أستيقظ على صوت ندائه وهو يفرك فى عيونه: معلش نمت وانا بالبس لانى مانمتش امبارح إلا ساعة واحدة بس.

هنبقة بيلبس هدومه 

أحمد البوهى