القطة بتاعته بتهوهو
يجرى الفاشل إلى أصدقائه وهو يقول: الحقونى .. الحقونى
وعندما يقترب منهما يقول سمورة لمن يجرى خلفه: أنت بتجرى وراه ليه انت فاكر انه مالوش أصحاب يدافعوا عنه
فيقول الرجل الذى يجرى خلفه: وهو ينفع إللى عمله ده
فيقول سمورة للفاشل: أنت عملت ايه يازفت؟
فيقول الفاشل: ماعملتش حاجة والله
فيقول الرجل: ينفع يعنى ياخد القطة بتاعى عشان يعالجها يرجعها لىَّ بتهوهو بدل ماتنونو
فيقول سمورة: وكان عندها ايه القطة
فيقول الرجل: كانت مكتئبة
فيقول سمورة للفاشل: هو انت بتفهم فى علاج الحيوانات ياد
فيقول الفاشل: أنا دكتور انت نسيت ولا ايه؟
فيقول سمورة للفاشل: الطالب بيدخل كلية الطب ويدرس فيها كذا سنة ويقعد بعد التخرج سنة امتياز كمان وفى الآخر بيتخصص فى فرع واحد من فروع الطب وكمان هناك كلية طب بشرى بتخرج دكاترة للبنى آدمين وطب بيطرى لعلاج الحيوانات وانت بتعالج البنى الآدميين والحيوانات كمان
فيقول الفاشل وهو مزهواً لنفسه: أنا عندى موهبة عبقرية فى الطب
فيقول سمورة له: خلاص ورينا عبقريتك ورجع القطة تنونو زى ماكانت ياعم العبقرى
فيقترب الفاشل من سمورة ويقول له بصوت منخفض: أنا حاولت وماعرفتش للأسف ياصاحبى
فيقول سمورة له: يعنى انت فاشل ومابتفهمش فى الطب بتحشر نفسك فى حاجة انت مش فاهمها ليه؟ يابنى أنا دماغى كلها بتاكلنى دلوقتى بسببك ونفسى أشد شعرى بس مش لاقى شعر أشده حرام عليك
فيقول تيخا: أنا عندى الحل يا جماعة
فيقول صاحب القطة له: وإيه هو الحل؟
فيقول تيخا: نجوز القطة دى لكلب
فيقول سمورة متسائلاً: وايه إللى هيحصل لما نجوزها كلب
فيقول تيخا برود: ماعرفش هى فكرة جت على بالى فقررت أقولها لكم يمكن تنفع
فيرفع سمورة إصبعه للسماء وهو ينظر لها ويقول: اللهم انى لا أسألك رد القضاء ولكن أسألك اللطف فيه.
 |
| القطة بتاعته بتهوهو |
أحمد البوهى
ليست هناك تعليقات:
إرسال تعليق