هيقاطع صاحبه بشكل نهائى
يسمع الشاويش مدبولى ينادى بصوت عالى: ياشاويش.. ياشاويش
فيقول الشاويش لنفسه: انت رجعت تنادى على صاحبك تانى، بنى أدم مستفز صحيح، ويكمل سيره مبتعداً ولا يتجه ناحية الصوت
وفى تلك الأثناء يمسك الطويل مدبولى من ملابسه ويقول له: أقلع أحسن لك
فيقول مدبولى بتحدى: مش قالع ويواصل ندائه بصوت عالى: ياشاويش.. ياشاااااويش
ولكن الشاويش يتجاهل ندائه حتى ييأس مدبولى من مجئ الشاويش فيقول للطويل: هو انت كل ماتقابلنى تقول لى إقلع
فيقول الطويل له: أه
فيقول له: لو أخدت هدومى هاأروح أعمل لك محضر فى القسم
- هتروح القسم عريان
يتلعثم ثم يقول: لأ طبعاً هارجع البيت ألبس لبس تانى وأروح القسم
- يعنى هتروح القسم لابس هدوم
- طبعاً انت عاوزانى أروح عريان
- طب وهاتثبت ازاى انى خدت هدومك
فيتلعثم مدبولى مرة أخرى ويقول: والله يعنى هو يعنى الشاويش عارف انك بتاخد من الناس هدومها
- القانون مابيعرفش الكلام ده لو ماعندكش دليل ماحدش هيقدر يعمل لى حاجة
فلا يجد بديلاً أمامه الا أن يخلع ملابسه ويعطيها له وأثناء سيره عريان يقابل الشاويش فيقول له: هو انت قابلت الطويل
فيقول مدبولى وهو يبكى: أه وناديت عليك ولكن انت ماسمعتنيش
فيقول الشاويش: هو انت كنت بتنادى علىَّ عشان كده
- أه هو انت سمعتنى
- أه وأفتكرتك بتنادى على صاحبك إللى مسمى نفسه الشاويش
فيقول له وهو مازال يبكى: أنا هقاطع صاحبى ده نهائى.
 |
| هيقاطع صاحبه بشكل نهائى |
ليست هناك تعليقات:
إرسال تعليق