فيلا للبيع دلوقتي وبأي سعر
أثناء سير الفأر فى المدينة مع صديقته، يرى فيلا. مكتوب عليها فيلا للبيع دلوقتى وبأي سعر، فيقول لصديقته: إيه رأيك. اشترى الفيلا المعروضة للبيع دى؟
فتقول له بسخرية: لو معاك تمنها اشتريها.
فيقول لها: منين؟ احنا فيران. مانفهمش فى لغة الفلوس دى.
- مش انت إللى بتقول: انك عاوز تشترى الفيلا.
- أه، وهاشتريها لان. الفيلا عاجبانى.
- ازاى؟
- طالما أصحاب الفيلا دى. عرضينها للبيع، يبقوا مش ساكنين فيها.
- وممكن يكونوا قاعدين فيها.
- لوبصيتى على الشبابيك. هتلاقى عليها تراب.
- وده معناه ايه ياشالوك هولمز؟
فيقول لها فى سخرية: شارلوك هولمز! ايه الثقافة إللى انتى فيها دى؟ أول مرة أشوف فأرة مثقفة.
- سيبك منى، وقولى معناه ايه؟ ان شبابيك الفيلا عليها تراب كتير.
- معناه. ان أصحاب الفيلا، مش قاعدين فيها، لأنهم لو قاعدين فيها. كانوا نضفوا الشبابيك.
- معاك حق، وأنا مش عارفة، ايه حكاية النضافة. إللى البنى آدميين شاغلين نفسهم بيها دى؟
- سيبك من الكلام الكتير ده، وتعالى ندخل من الفتحة إللى هناك دى.
وبعد أن يدخلوا الفيلا، يتجولوا بداخلها، وأثناء تجوالهم يرى الفأر بقايا أكل ملقى فى سلة المهملات، من أكثر من شهر. فيقول لها: وكمان فيه أكل. عشان مايتعملش فينا إللى اتعمل لما روحنا الفيلا إللى فى الكمبوند.
فتقول له: ماتفكرنيش، أنا يومها بسببك أفكارك دى. فضلت اليوم كله ماأكلتش حاجة.
- أفكارى دى، هى إللى خلتنا ندخل هنا.
ويمر الوقت سريعًا عليهما، ويأتى الليل. وعندما يدخل الظلام ويملأ المكان. يسمعا صوت خبط وضوضاء، فتخاف الفأرة وتقول له: إيه الخبط ده؟
فيقول مطمئناً لها: تلاقيهم بيصلحوا حاجة فى الشارع.
وبعدها ترى الفأرة كائنات غريبة تجرى أمامها، وحولها فتصرخ، وتقول له: أيه إللى بيجرى قدامنا .
- دى تهيوأت.
- بس، دى تهيوأت أول مرة أشوفها.
وبعد أن تنهى كلامها، يشعر بضربة قوية على رأسه، فيصرخ من الألم. فتقول له: فى ايه؟
فيقول لها. وهو يحاول أن يتماسك، حتى لا يظهر تألمه لها: مافيش، مجرد تهيوأت، وفى تلك اللحظة يشعر بقدم تركله، فيصطدم فى الحائط. ويقع على الأرض وهو يصرخ، ويقول لنفسه: أنا دلوقتى. عرفت ليه أصحاب الفيلا عايزين يبيعوها بأي سعر، فتحمله صديقته وتهرب من الفتحة التى دخلوا منها، وفى الشارع ينام أمامها. وجسمه كله فى الجبس، وتقول له القأرة: هو انت كده كل فترة. التهيوأت تكسر جسمك كله من الضرب.
فيقول لنفسه، بدون أن تسمعه الفأرة صديقته: أنا إللى استاهل كل إللى جرى لى، لانى دخلت الفيلا دى، ويواصل كلامه لنفسه، ويقول: بس أنا. كنت اعرف منين انها مسكونة بالعفاريت.
 |
| فيلا للبيع دلوقتى حالاً |
أحمد البوهى
ليست هناك تعليقات:
إرسال تعليق