يتمنى أن يركب آلة الزمن
يسير عاطف العاطفى مع راوى فى أحد شوارع المدينة ويقول له : أنت رابط ايدك كده ليه ؟
فيقول له عاطف العاطفى : أصلها اتحرقت
- وايه السبب ؟
- من يومين بأقول لمراتى أنا نفسى أركب آلة الزمن
فسأله راوى : وعاوز تركبها ليه ؟
- هى برضو سألتني نفس السؤال
- وقولت لها ايه ؟
- قولت لها نفسى أركبها علشان ارجع لوقت قبل ماعرفك أو أشوفك
- وكان ردها ايه ؟
- هى ما ماتكلمتش أصلاً
- معقولة ، يعنى ماكنش فى أى رد فعل منها على الكلام ده
- لأ كان فيه رد فعل طبعاً
- وايه كان رد فعلها ؟
- ضربتنى بكوباية شاى سخنة كانت فى اديها والحمد لله ماجتش فى وشى والا كانت زمنها شوهتنى
- وجت فين الكوباية ؟
- جت فى ايدى زى مانت شايف وحرقتها
- معاه حق انها تضربك بكوباية الشاى
- ليه ؟!
- أنت غريب قوى يا أخى
- ليه أنا عملت ايه ؟
- فيه راجل عاقل يقول لمراته كده !!
- وليه الاستعجال فى الحكم على كلامى قبل ما أكمله
- وكنت ناوى تقول ايه بعد إللى قولته ؟ وكويس انها ضربتك بكوباية الشاى قبل ماتكمل
- ليه
- أكيد كنت هاتقول كلام يستفزها أكتر
- شوفت برضو بتتسرع فى الحكم على كلامى إللى انت لسه ماسمعتوش
- وكنت ناوى تقولها ايه يافصيح عصرك وأوانك ؟
- كنت عاوز أقول لها انى كنت عاوز أركب آلة الزمن عشان أرجع لزمن قبل ما أشوفها او اعرفها عشان أشوفها وبعدين أعرفها مرة تانية وأحبها من جديد .
 |
| يتمنى أن يركب آلة الزمن |
أحمد البوهى
ليست هناك تعليقات:
إرسال تعليق