الرجل الغامض والفأر
 |
فيقول الرجل الغامض له : أيوه تعالى انا عاوزك
- عاوز منى ايه ؟
- لما ايجى هاقولك تعالى ماتخافش انا محتاج لك
- هتحتاج من فار صغير الحجم ايه ؟
- ده صغر حجمك ده ميزة كبيرة قوى ده بجانب مهاراتك فى المشى على الحائط كل ده انا محتاجه عشان كده انا عاوزك
- ايه عاوز تاخده منى ؟
- لأ عاوز اتعاون معاك وأستفيد من مهاراتك وصغر حجمك تعالى عشان نتفق
- بس أنا عمرى ما اتعاونت مع بنى آدمين قبل كده وعلاقتى بيهم مش تمام ودايماً أول مابيشوفونى بيجروا ورايا وبيحاولوا يقتلونى
- بس انا مش هاقتلك لأنى محتاج لك
- انا مش مطمن لك
فيقول الرجل له بصوت منخفض : أنا حرامى وعاوزك تساعدنى فى السرقة وكل اللى انت عاوزه هاجيبهولك
يبدو الاهتمام على وجه الفأر ويقول له : انا بأحب الجبن بكل أنواعها
- هاجيب لك كل أنواع الجبن وكل حاجة تطلبها بس تنفذ اللى هاقولك عليه
يقترب الفأر من الرجل ويقول له : موافق قولى بقى عاوزنى اعمل ايه
- حاجة بسيطة جداً تمشى على الحائط وتدخل الشقة اللى انا هأقولك عليها من الشباك وتفتح لى الباب وسيب الباقى علىَّ
- وهأعمل كده امتى؟
- بكره
- اتفقنا
وفى اليوم التالى يأتى الفأر إلى الرجل فى المكان الذى قال له عليه ومعه صديقته فيسأله الرجل : مين دى ؟
- دى صاحبتى وبنعمل كل حاجة سوا
- طب كويس عشان تساعدك يلا امشوا على الحائط لحد الدور التالت وادخلوا من الفتحة الصغيرة المكسورة من الشباك وافتحوا لى الباب
فتقول صديقة الفأر للرجل : احنا لو عملنا كده صاحب الشقة هيقبض علينا كلنا
فيقول الرجل الغامض : صاحبها مش فيها مابيرجعش قبل الساعة الثانية عشر واحنا دلوقتى الساعة الثامنة ومافيش حد عايش معاه
فيصعد الفئران على الحائط ويدخلا الشقة من الفتحة الصغيرة الموجودة بالشباك ويفتحا الباب للرجل الغامض فيدخل ويبدأ فى سرقة كل ماتحتويه الشقة والفأر وصديقته يقفان فى الصالة ويعود الرجل صاحب الشقة فى ذلك اليوم مبكراً .
انتظروا الجزء الثانى
لقرأة المزيد من حكايات الفأر اضغط على هذا الرابط
أحمد البوهى
ليست هناك تعليقات:
إرسال تعليق