تلج الشتاء منعه من الاستحمام
 |
| تلج الشتاء منعه من الاستحمام |
فى يوم من أيام الشتاء شديد البرودة يتقابل جورج والضيف وسمير على مقهى ويجلس الضيف معهم ولكن بجسد فقط فيلاحظا هذا الأمر فيسأل جورج للضيف: مالك يابنى شايل الهم كده من ساعة ما اتقابلنا؟ وسرحان على طول، واضح ان عندك مشكلة
فيقول الضيف: أه عندى مشكلة صعبة ومش قادر الاقى لها حل
فيقول سمير: قول مشكلتك يمكن نقدر نساعدك
فيقول: دى مشكلة صعبة جداً، وانا متأكد ان مالهاش حل
فيقول جورج: يابنى مافيش مشكله مالهاش حل
فيقول الضيف: مشكلتى إنى بأفكر استحمى النهاردة لما ارجع البيت
فيقول سمير فى سخرية: وايه المشكلة فى كده؟
فيقول الضيف: انتوا عارف انا ماستحمتش من امتى
فيقولا فى صوت واحد: من امتى؟
فيقول الضيف: من أول الشتاء
فيقول سمير فى قرف: وانا عمال أقول الريحة الوحشة دى جاية منين
فيقول الضيف: تبقى ريحتى وحشة احسن ما استحمى
فيقول جورج: ليه يابنى كده؟
فيقول الضيف: يعنى عاوزينى أقلع هدومى وادخل استحمى فى التلج ده
فيقول سمير: وايه المشكلة؟
فيقول الضيف: يعنى ينفع اجيب ايدك فى يوم حر أحطها على النار؟
فيقول سمير: لا طبعاً
فيقول الضيف: يبقى ازاى عايزنى أقلع هدومى و اخش استحمى فى البرد ده؟
فيقول سمير مستغرباً: وايه علاقة الاستحمام بالمثل اللى قولته
فيقول الضيف فى بلاهة: مش عارف
فيقول سمير له: يابنى روح استحمى وبلاش قرف
فيقول الضيف: لا
فيقول جورج: يابنى اسمع الكلام
فيقول الضيف: لا مش هاسمع ومش ها اقلع هدومى فى التلج ده
فيقول جورج: يعنى لما بتروح مش بتغير هدومك
فيقول الضيف: أنا من اول الشتا وانا لابس الهدوم دى وبانام بيها كمان
فيقول سمير: وأنا بأقول ليه كل مانتقابل الاقيك لابس نفس اللبس؟
ويقول جورج فى سخرية: أنا عرفت دلوقتى ليه انت لابس كل هدوم الشتا اللى عندك ههههههه
فيقول الضيف: الحمد لله انكم عرفتم
فيقول جورج: يعنى انت غيرت رأيك ومش هتستحمى
فيقول الضيف: مش عارف عمال أفكر من اسبوع ولحد دلوقتى مش قادر آخد قرار
فيقول سمير مستغرباً: من أسبوع ليه؟! هو انت هتحل مشاكل العالم
فيقول الضيف: حل مشاكل العالم أسهل من اللى إنى أقلع هدومى فى التلج ده
فيقول جورج: ليه يابنى؟
فيقول الضيف: الاستحمام فى الشتاء مرعب اكتر من أى فيلم رعب
فيقول سمير: للدرجة دى!!
فيقول الضيف: أه
فيقول جورج: وايه قرارك اللى ناوى تاخده؟
فيقول الضيف: واضح إنى لازم أصلي صلاة استخارة، والحمد لله إنى عندى شعر
فيقول سمير: أنت بتلقح بقى
فيقول الضيف: لا مش قصدى، بس الشعر الحمد لله مدفى راسى
يضع سمير يده على رأسه ويقول نفس الاقى حاجة أشدها، يارب شعرتين اتنين بس اشدهم وارتاح
فيقول جورج والضيف فى صوت واحد: يااااارب
ليست هناك تعليقات:
إرسال تعليق