حدث أثناء مباراة مصر فى كأس أمم أفريقيا
حدث أثناء مباراة مصر فى كأس أمم أفريقيا
يجلس سعيد ويونس على المقهى فى انتظار بدء مبارة مصر فى كأس أمم أفريقيا فيقول سعيد له: لو مصر غلبت هتجيب لى سحلب
فيقول يونس له: ولو مصر لا قدر الله اتغلب
فيقول سعيد له: لو مصر لاقد الله اتغلبت هتجيب لى سحلب برضو
فيقول يونس: واجيب لك سحلب ليه لو مصر اتغلب؟
فيقول سعيد: عشان أنا هبقى زعلان ومتضايق أن مصر اتغلبت، ولما باكون زعلان بأحب اشرب سحلب برضو
فيقول يونس: خلاص يبقي لو مصر غلبت وصعدنا للنهائي مش ها عزمك على حاجة
فيقول سعيد: ماينفعش
فيقول يونس: ليه ماينفعش؟
فيقول سعيد: لأنى بحب اشرب سحلب وانا سعيد برضو
فيقول يونس: أنا ماليش دعوة مصر تغلب تتغلب مش هاعزمك على أى حاجة واسكت بقى عشان الماتش هيبدأ، خلينى أعرف أتفرج على الماتش بمزاج
فيقول سعيد: طب اعزمنى على سحلب دلوقتى، لأنى بحب أشربه وأنا باتفرج على المباريات فيقول يونس له:انت يا ولا انت اسكت، وبطل تضايقنى وسيبنى اتابع اللعب عشان ما اضربكش
فيقول سعيد له: انت هتضربى أنا
فيقول يونس له: أه هأضربك لو مسكتش
فيقول سعيد: طب هتضربى بإيه ؟
فيقول يونس: باى حاجة هتيجى فى ايدى
وفى تلك اللحظة يصل عادل: ويقول السلام عليكم، الحمد لله وصلت قبل الماتش مايبدأ
فيقول يونس له: قول للولا ده مايضايقنيش، ويسيبنى اشوف الماتش
فيقول عادل: هو عمل لك ايه؟
فيقول يونس: عاوزنى اعزمه على سحلب
فيقول عادل: وعزمته
فيقول يونس: لأ، ومن ساعتها وهو بيضايقنى
فيقول عادل: أنا لو منك أضربه قليل الأدب ده
فيقول يونس: أنت شايف كده
فيقول عادل: أه، يلا أضربه
فيضرب يونس الهواء بيده ويقول: خد ياقليل الأدب انت
فيقول سعيد: أي أنت ضربتني بإيه ؟
فيقول يونس فى سذاجة: بالهوا هو ده إللى طالته ايدي
فيقول عادل: حرام عليك، ليه تضربه بالهوا، صالحه بقى وهات له السحلب اللى هو عاوزه
فيقول يونس: أنت شايف كده
فيقول عادل: آه وهات لى معاه سحلب، لأن المنظر كان بشع ونفسيتي تعبت جداً منه، يلا اطلب السحلب قبل الماتش مايبدأ، يلا أطلب عشان نركز فى الماتش، لأنه الماتش اللى هيوصلك أن شاء الله لنهائى بطولة أفريقيا، ونفوز بكأس أفريقيا ان شاء الله.
 |
| حدث أثناء مباراة مصر فى كأس أفريقيا |
ليست هناك تعليقات:
إرسال تعليق