خلص الكلام وانتهى مع الصحاب
يقول سعيد ليونس أثناء سيرهما معاً فى أحد شوارع المدينة : وفضلت اتكلم معاهم واتكلم واتكلم لحد ما خلص الكلام وانتهى، فروحت ساكت وسايبهم وماشى
فيقول يونس: ومشيت ليه ؟
فيقول سعيد : عشان خلص الكلام
فيقول يونس: وهو الكلام بيخلص
فيقول سعيد : أه الكلام بيخلص
فيقول يونس : طب لما هو الكلام خلص بتتكلم معايا ازاى
فيقول سعيد : اسكت انت مش فاهم حاجة، ويضع يده على وجهه مداعباً له
فيقول يونس : اوعى ياولا كده، انا برضو اللى مش فاهم حاجة، ياولا انت يابتاع خلص الكلام، هو الكلام بيخلص ياولا ياعبيط انت
ويقابلهم عادل فيراهم على هذا الحال فيسألهم عن سبب مايحدث بينهم فيقول يونس له : الولا ده بيقول ان الكلام خلص وهو بيكلم صحابه
فيقول عادل له : أنت كنت بتتكلم مع مين؟
فيقول سعيد له : مع أصحابى زى ما قالك كده
فيقول عادل له : اصحابك مين ؟
فيقول سعيد : اصحابى انت ماتعرفهمش
فيقول عادل له : وانت بتعرف أصحاب من ورايا
فيقول سعيد : آه عادى يعنى، ايه المشكلة فى كده ؟
فيقول يونس لعادل : ماتصدقهوش ده بيقول أى كلام، هو الكلام أصلاً بيخلص
فيقول سعيد : أه بيخلص
فيقول يونس : طب لما هو خلص بتتكلم دلوقتى ازاى
فيقول سعيد : ما انا بقى روحت بقى للراجل بتاع الكلام وجبت شوية كلام طازة
فيقول عادل : طب ابقى ادينى عنوانه عشان ابقى اروح اجيب منه شوية كلام طازة انا كمان، بس انت متأكد أنه الكلام اللى بيبيعه طازة
فيقول سعيد : أنا دايماً بتعامل معاه، ودايماً باخد منه كلام طازة
فيقول يونس : خلاص ادينى انا كمان العنوان عشان أروح اجيب البتاع ده
فيقول سعيد له : بتاع ايه ؟
فيقول يونس : البتاع اللى بيخلص ده
فيقول يونس له : هو ايه البتاع اللى بيخلص ؟
فيقول يونس : اللى هو خلص وانت بتتكلم مع اللى ...
فيقول سعيد : اللى ايه ؟
فيقول يونس له : هات بس العنوان وانا هتصرف
فيقول سعيد : هتعمل ايه يعنى ؟
فيقول يونس : ما لكش دعوة، هات بقى البتاع اللى طلبته منك
فيقول سعيد : بتاع ايه ؟
فيقول يونس له : بس ياولا انت، انا مش عاوز منك حاجة وانا هتصرف وهاعرف أروح للبتاع عشان اجيب البتاع التانى اللى هو بيخلص ده .
 |
| خلص الكلام وانتهى مع الصحاب |
ليست هناك تعليقات:
إرسال تعليق