شوف الرهن العقارى يمكن ينفعك
 |
| شوف الرهن العقارى يمكن ينفعك |
يمر راوى مساءاً من أمام بيت عاطف العاطفى فيجده يجلس فى الشارع فيقول له : هو أنا كل ما أمر من قدام بيتكم الاقيك قاعد فى الشارع كده
فيقول له فى حزن : مراتى طردتنى لانها عاوزة شقة جديدة وأنا مافيش معايا فلوس أجيب لها شقة جديدة
- خلاص روح أى بنك وأعمل رهن عقارى وهات لها الشقة إللى هى عايزها
- ويتعمل ازاى الرهن العقارى ده
- روح البنك وهناك أطلبه منهم وهما هيعملوا لك الإجراءات
- وبعدها أخد الشقة
- أيوه
فيذهب عاطف العاطفى للبنك ويقول لموظف البنك : أنا عاوز أعمل الرهن العقارى بتاع الشقق فيقوم موظف البنك بعمل الإجراءات فيقول عاطف العاطفى له : وهأستلم الشقة امتى ؟
فيقول له الموظف : انت إللى تختار الشقة والبنك هيدفع لك تمنها
فيذهب عاطف العاطفى سعيدا لزوجته ويقول لها: شوفى الشقة إللى انت عايزاها
فتبحث زوجته عن الشقة التى تريدها حتى تجدها ويذهب عاطف العاطفى ليكمل إجراءات الرهن العقارى ويستلم الشقة
وبعد سنه يمر راوى على منزل عاطف القديم فيجده معلق فى البلكونة فيقول له : أنت ايه إللى رجعك وعلقك هنا تانى ؟
فيقول له : بعد ما استلمت الشقة وقعدت فيها سنة لقيت البوليس جه وخرجنى من الشقة
- ليه ؟
- قالوا لى انى ماكنتش بأدفع الاقساط بتاعة الرهن العقارى للبنك
- وليه ماكنتش بتدفع اقساط الرهن العقارى وبعدين انت مش قدمت لهم مفردات مرتبك عشان يخصموا الاقساط من المرتب
- ما هو أنا سبت الشغل بعد ما عملت الرهن العقارى ده
- طب ليه ماكنتش بتروح تسدد أقساط الرهن العقارى للبنك
- ما نا كنت فاكرهم ناس طيبين وساعدونى بالفلوس دى
فيقول له راوى فى غضب : والله أنا لو مكان مراتك مش اعلقك من رجليك كده وبس
فيقول له : كنت هتعمل ايه يعنى اكتر من كده ؟
فيقول له فى غضب : والله مانا عارف أنا كنت هاعمل فيك ساعتها ، بس كنت هاعمل فيك حاجة مش عادية ومش طبيعية حاجة ماتعلمتش قبل كده ولا هتعمل بعد كده
- كنت هاتجيب لى شقة طبعاً ، صح
فيتركه راوى ويمشى دون أن يرد عليه
أحمد البوهى
ليست هناك تعليقات:
إرسال تعليق