بيتحرش بفتاه قدام الشاويش
فى شارع جانبى شبه مظلم فى المساء يسير شاب خلف فتاة فى الشارع ويقول لها : إسمعينى ياجميلة
ولكنها تكمل السير دون أن تنظر إليه فيقول لها: انت ليه مش عاوز تتكلمى معايا بس
ولكن الفتاة تواصل السير بسرعة فيسرع الشاب ليلحق بها ويمسكها من ذراعها فتقول الفتاة له فى غضب : لو ماسيبتش دراعى دلوقتى هاصوت وألم الناس عليك
فيقول الشاب : ناس مين إللى هيتلموا علينا فى الوقت ده وزى مانت شايفة الشارع فاضى ومافيهوش حد غيرنا
ويقترب الشاويش منه ويقول : هو فعلاً فاضى يا قليل الأدب يامجرم يامتحرش بس أنا بقى موجود فيه ، بقى بتعاكس فى المنطقة إللى أنا موجود فيها قدامى على الحجز يامتحرش يامجرم
يقول الشاب فى فزع : أنا مش بعاكس والله ياشاويش
فيقاطعه الشاويش ويقول : مابتعاكسش طب انت بتعمل إيه دلوقتى يامجرم يا قليل الأدب قدامى على الحجز
- ياشاويش بس إسمعنى
- مش هاسمعك واى حاجة عاوز تقولها ابقى قولها لحضرة وكيل النيابة امشى قدامى يامتحرش يامجرم
- الحقينى ياجميلة دى فيها نيابة
- وكمان بتعاكسها قصادى وتقولها ياجميلة قدامى يامتحرش انت ليلتك مش فايتة معايا ويجذبه من ياقة القميص ويقول : قدامى عشان أرميك فى الحجز وأنضف المجتمع منك يامتحرش
فتقول الفتاة : سيبه ياشاويش
فيقول الشاب : بتقولك سيبه ياشاويش
فيقول الشاويش : عايزانى أسيبه بعد ماعاكسك واتحرش بيكى ومسك دراعك ياقليلة الأدب
فتقول الفتاة : أيوه ياشاويش سيبه لأنه خطيبى وأنا إسمى جميلة وكنت مخاصماه لأنه ماجابش لىَّ ورد فى عيد ميلادى وكان بيحاول يصالحنى
فيقول الشاب : والله ياشاويش جبت لها خمس وردات وهى كانت عاوزة سته
فيقول الشاويش له : برضوا قدامى على الحجز لأنك زعلت البنت إللى زى القمر إللى منور الدنيا بالليل ده
فيقول الشاب : قدامى انت بقى على الحجز ياشاويش
فيقول الشاويش له : بقى انت اللى عاوز تاخدنى أنا للحجز
- أه ياشاويش لأنك بتتحرش بخطيبتى قدامى
فيضحك الشاويش ويقول له : أوعى تزعل القمر ده منك تانى
فيقول الشاب : انت بتتحرش بخطيبتى تانى
 |
| بيتحرش بفتاه قدام الشاويش |
أحمد البوهى
ليست هناك تعليقات:
إرسال تعليق