سهر معاها فى الكازينو للصبح
يسمع الشاويش صوت صراخ بسبب خناقة فيتوجه ناحية صوت الصراخ وبعد أن يصل لمكان الخناقة يرى الشاب والفتاة فيقول : انت نسيت تجيب لها ست وردات تانى
فيقول الشاب له : الموضوع مش كده خالص كده ياشاويش
فتقول الفتاة فى غضب : وكمان بتقول انه موضوع بسيط
فيقول الشاويش : واضح أنك عملت مصيبة المرة دى
فيقول الشاب : أبداً ياشاويش انا مظلوم والله
فتقول الفتاة : اتمسكن ياخويا اتمسكن قدام سيادة الشاويش
فيقول الشاويش : والله انت بنت بتفهمى وذوق والولد ده مايستاهلكيش
فيقول الشاب : ليه كده بس ياشاويش كل ده عشان قالت لك سيادتك
فيقول الشاويش : لأ عشان زعلت البنت الذوق دى بذمتك يامغفل فى حد عاقل يزعل القمر ده
فيقول الشاب : طب أنا هاحكى لك الحكاية ياشاويش
فتقول الفتاة : أه إحكى له الحكاية عشان سيادته يعرف انك ظالمنى
فيقول الشاويش : إحكى يا سيدى
فيقول الشاب : كل الخناقة دى ياشاويش علشان نسيت أكتب لها على الواتس صباح الخير النهاردة
فتقول الفتاة : شفت ياشاويش اعترف بنفسه وقال نسيت
فيقول الشاويش : أنا ماعرفش فى قانون العقوبات مادة تعاقب حد نسى يعمل حاجة زى دى
فتقول الفتاة بدلال : بس فى قانون الحب فيه ياشاويش
فيقول الشاويش : أنا ماعرفش القانون ده
فيقول الشاب : ياشاويش امبارح سهران معاها لبعد الفجر فى الكازينو ومانمتش غير ساعتين وقمت متأخر وجربت علشان ألحق أروح الشغل فماقدرتش أكتب لها صباح الخير يبقى كده أنا غلطان
فتقول الفتاة : أه غلطان
فيقول الشاويش للفتاة : يعنى انت شايفاه غلطان
- أه طبعاً
فينظر الشاويش ويقول للشاب : افسخ يابنى الخطوبة دى
فتقول الفتاة للشاب فى دلال : والله لو فسخت الخطوبة لازعل منك وأخاصمك ومش هاكلمك تانى أبداً
فيقول الشاويش فى حزم : مرة تانية تعملوا دوشة فى الشارع وتقلقوا الناس هاخدكم أرميكم فى الحجز انتوا الاتنين فاهمين
فيقول الشاب : لو انا وهى فى حجز واحد موافق ياشاويش
فيقول الشاويش : لا ناصح أنا هاقعدك مع أشكال عمرك ماهتنساها أبداً طول حياتك تحب تيجى تشوف .
فيقول الشاب : لا ياشاويش خلاص أنا بعد كده مش هتكلم خالص وأنا ماشى فى الشارع .
 |
| سهر معاها فى الكازينو للصبح |
أحمد البوهى
ليست هناك تعليقات:
إرسال تعليق