ضيعته فهات له محامى بسرعة
يذهب الشاويش إلى منزل العمدة ويرن جرس الباب وبعد أن يفتح العمدة يقول له : هات الحمار إللى عندك
فيقول له العمدة : حمار ايه ياشاويش ؟ أنا ماعنديش حمير
- أدخل هات الحمار بأقولك بدل ماخدك مكانه
- ياشاويش أنا ماعنديش حمير والحظيرة عندك جوه أدخل فتشها
- يبقى عرفت انى هاجى أأقبض عليه قمت هربته
- ياشاويش أنا بأقولك الحقيقة أنا ماعنديش حمير
- لأ عندك وكل أهل البلد قالو لى ان الحمار الغبى ده بتاعك
- أه انت تقصد الحمار الغبى إللى ماشى فى البلد مش عارف هو حمار ولا لأ
- ايوه هو
- أنا طردته من زمان وماعرفش عنه أى حاجة
- وتطرده ليه وتهدد الأمن العام بتاع البلد ؟
- لأنه كان عامل مشاكل مع التور وعاوز يجوز الجاموسة مراته
- طب دى مشاكل عائلية ايه دخل البلد بيها
- أنا مش فاهم انت عاوز منى ايه ؟
- عاوز الحمار
روح دور عليه لأنه مش عندى
- ماهو أنا لو ماخدتش الحمار هاخدك انت
- وانا مالى
- مش الحمار ده بتاعك
- كان وطردته
- وتطرده ليه ؟ وتسيبه يرفس فى رجال الأمن
- هو رفسك
يتلعثم ثم يقول : مالكش دعوة ويلا قدامى يامتهم على الحجز
- طب ممكن اكلم المحامى بتاعى
- كلم المحامى بتاعك ده من الحجز يامتهم ويلا قدامى
يخرج قريبه ويقول له : ماتخافش يابنى عمى هاحصلك بعيش حلاوة
- عيش وحلاوة ايه ؟! هات لى محامى الله يخرب بيتك
يقول قريبه متعجبا : محامى أول مرة أسمع عن أكلة إسمها محامى ويستطرد قائلاً : وبعدين انت ياشاويش ازاى تقبض على العمدة
فيقول العمدة فى فزع : الله يخرب بيتك أسكت
- ليه هو مش انت عمدة البلد زى مانت قولت لى يبقى ازاى الشاويش ده يقبض عليك !!
- ماتصدقهوش ياشاويش أنا إسمى عماد واسم الدلع بتاعى عمدة
- بس انت كنت مفهمنى انك عمدة البلد هو مش انت العمدة بتاع البلدى يابن عمى ولا كنت بتضحك علىَّ
فيضحك الشاويش ويقول : هههه وكمان بتزور فى مناصب رسمية واضح أنك هتشرف عندنا كتير ، وبصراحة انا ارتاحت لك وعايزك تفضل عندنا فى الحجز مدة طويلة ، قدامى يامتهم يامجرم .
 |
| ضيعته فهات له محامى بسرعة |
حكايات العمدة
ليست هناك تعليقات:
إرسال تعليق