الراجل اللى رن الجرس صاحب صاحبه
يصر الشاويش على أن يأخذ الرجل الذى ضرب الجرس وتسبب فى هروب الفئران من بيته للحجز والرجل يتوسل إليه أن يتركه وفجأة يصمت الشاويش لبرهة ثم يقول له : أنت بتقول عاوز مين
فيقول الرجل له : عاوز حمدى فتحى ياشاويش
فيردد الشاويش إسم الرجل عدة مرات فى محاولة لتذكر الإسم ثم يقول : أنت بتقول حمدى فتحى
- أه ياشاويش
يخرج الشاويش بطاقته من جيبه وينظر فيها ويقول له : أنا حمدى فتحى
- انت ياشاويش
- أه ومن كتر ما الناس بتنادى علىَّ ياشاويش ... ياشاويش نسيت إسمى
- معقولة نسيت إسمك
- أه من كتر المسؤوليات إللى بأقوم بيها لحفظ الأمن
- الله يكون فى العون ياشاويش
- وانت جاى لى ليه عاوز منى ايه ؟
- تعرف إسماعيل
- إسماعيل مين ؟
- صاحبك إللى كنت بتلعب معاه وانت صغير فى بلدكم
- إذا كنت ناسى إسمى يبقى هافتكر صاحبى إللى كنت بألعب معاه وأنا صغير فى البلد
- هو قال لى لو نسيته أفكرك بيه بحاجة حصلت لك وانت صغير ومش ممكن هاتنساها أبداً
- وايه الحاجة دى
- فاكر لما كنت هاتغرق فى الترعة وكان هو معاك وسابك ومشى
- وانت تقرب ايه للرخم ده
- هو انت افتكرته
- أه المهم انت تقرب له ايه
- أنا مش قريبه أنا كنت زميله فى المدرسة الاعدادية
- يعنى الرخم ده هو إللى بعتلك لى
فيقول الرجل فى سعادة : أه
فيقول الشاويش له : وكمان فرحان وبتضحك
- أه
- طب قدامى بقى على القسم
- ليه ياشاويش هو مش إحنا خلاص بقينا أصحاب
- اصحاب ازاى يعنى
- طالما انت صاحب صاحبى تبقى صاحبى
- ومين قال لك ان الرخم ده يبقى صاحبى
- هو ياشاويش
- يبقى ضحك عليك يا حلو وقدامى بقى على الحجز .
 |
| الراجل اللى رن الجرس صاحب صاحبه |
لقرأة الجزء الأول من الحياة اضغط هنا
أحمد البوهى
ليست هناك تعليقات:
إرسال تعليق