الشاويش قبض عليه لانه بيسأله عن واحد صاحبه

يدخل الشاويش شقته فيجد الفأر وصديقته موجودون بالصالة فيقول لهم فى غضب : انتو دخلتوا شقتى ازاى ؟

فيقول الفأر فى برود : دخلنا من الشباك المفتوح ده

فيقول الشاويش بعصبية: ومين إللى إذن لكم أنكم تدخلوا من الشباك لشقتى ؟

فتقول الفأرة ببرود ايضاً: مافيش حد أذن لنا احنا لقينا الشباك مفتوح دخلنا

- طالما دخلتم من غير ما أسمح لكم تبقوا حرامية 

فتقول الفأرة : لا احنا مش حرامية احنا دخلنا نقعد شوية عندك وبعدها هنمشى 

- واضح انكم بتهرجوا 

فيقول الفأر : لا مش بنهرج والله 

وتقول الفأرة ببرود : ماعندكش حاجة ناكلها

- ايه البرود إللى انتوا فيه ده

فيقول الفأر : انت ليه متضايق مننا كده عموماً احنا كنا عاوزين ندخل ونخرج من غير ماتعرف 

وتقول الفأرة لتؤكد كلامه : أه كنا فعلاً عاوزين نعمل كده عشان ماتنزعجش بس للأسف انت عرفت 

فيخرج الشاويش مسدسه ويقول فى عصبية : والله لأضربكم بالمسدس وأموتكم يا أبرد مخلوقات شوفتها فى حياتى

فيقول له الفأر : أستنى بس ماتتهورش مش انت شاويش

فيقول فى عصبية : وانتى عاوزة تعرفى انى شاويش ولا مش شاويش ليه ؟

- أسمعنى  بس  

- عاوز ايه اخلص 

- طالما انت شاويش أقبض علينا وارمينا فى الحجز

- الحجز ده للبنى أدمين مش للفيران اللى زيكم 

وفى تلك الأثناء يمر جرس الباب فيذهب الشاويش ليفتح الباب فيهرب الفأر وصديقته من الشباك ، وعندما يفتح الباب يجد رجل يسأله : هى دى شقة فتحى على 

فيقول له الشاويش فى غضب بعد أن شاهدهم وهم يهربون من الشباك : والله لأقبض عليك يامجرم 

فيقول الرجل فى خوف: أنا مش مجرم أنا بأسأل عن فتحى على

- أنا ماليش دعوة انت كنت سبب هروبهم منى ولازم أقبض عليك 

- والله ما كان قصدى أنا كنت عاوز صاحبى فتحى على

- بتسأل عن صاحبك ولا ما بتسألش ماليش دعوة انا هاقبض عليك لأنك كنت سبب هروبهم .

الشاويش قبض عليه لانه بيسأله عن واحد صاحبه 

لقرأة المزيد من حكايات الفأر اضغط هنا 

 لقرأة الجزء الثانى من الحكاية اضغط هنا 

أحمد البوهى